ئیسرائیل نزیکەی 300هەزار دانیشتووی ڕەفەح ڕادەگوێزێت

ئاڤا نیوز

سوپای ئیسرائیل ئۆپەراسیۆنی سەر ڕەفەحی فراوانتر کردووە، لەو چوارچێوەیەشدا نزیکەی 300هەزار کەسی لە ڕۆژهەڵاتی ڕەفەح ڕاگواستووە.

وێنە گەورەکە: سەرەڕای هۆشدارییەکانی ئەمریکا و نیگەرانییە نێودەوڵەتییەکان، ئیسرائیل بە ژمارەیەکی زۆر تانک و سەرباز، ڕەفەحی گەمارۆ داوە و ئۆپەراسیۆنە سەربازییەکەی فراوانتر کردووە. 

لە لایەكی دیكەوە: سوپای ئیسرائیل لە ڕێگەی کورتەنامە و پەیامی دەنگیی مۆبایلەوە دانیشتووانی چەند ناوچەیەکی ڕەفەحی ئاگادار کردووەتەوە کە شوێنەکانیان جێبهێڵن. 

زانیاریی زیاتر: ئیسرائیل ئەو کەسانەی بۆ ناوچەی ئەلمەواسی، کە بە "ناوچەی مرۆیی" ناوبراوە، گواستووەتەوە. نەتەوە یەکگرتووەکانیش هۆشداری داوە کە ئەو ناوچەیە ژمارەیەکی زۆر خەڵکی لێیە و توانای وەرگرتنی خەڵکی نوێی نییە.