پاڵاوگەیەکی هەولێر ئاگری گرت و بەهۆیەوە زیانێکی گەورەی بەر کەوت

ئاڤا نیوز

 

پاڵاوگەیەکی هەولێر کە (کاری دیار) ناسراوە و ئەهلییە و لە گوندی سێپارەی نزیک پردێ هەڵکەوتووە، ئاگری تێبەربووە و بەهۆیەوە زیانێکی گەورەی ماددی بەر دەکەوێت.

 

لێدوانی فەرمی: شاخەوان سەعید، گوتەبێژی بەڕێوەبەرایەتیی بەرگریی شارستانیی هەولێر تایبەت بە ئاڤا نیوزی گوت: "شەش تیمی بەرگریی شارستانی گەیشتوونەتە پاڵاوگە ئاگرتێبەربووەکە و دوای دوو کاتژمێر توانییان ئاگرەکە بکوژێننەوە".

 

زانیارییە بەدەستهاتووەکان: تاوەکو ئێستا دەرنەکەوتووە ئاگرەکە بەهۆی چییەوە بووە، بەڵام شاخەوان سەعید دەڵێت، بە هۆی ئاگرەکەوە چوار تەنکەری نەوتی ڕەش سووتاون و زەرەرێکی گەورەی ماددی بەر پاڵاوگەکە کەوتووە، "هەرچەندە توانرا 50 هەزار لیتر سووتەمەنی ڕزگار بکرێت".

 

بۆچوونی لایەنی بەرامبەر: حاجی دیار کە خاوەنی پاڵاوگەکەیە بە ئاڤا نیوزی گوت: "خۆم لە شوێنی ڕووداوەکە نەبووم، بۆیە نازانم ئاگرەکە بەهۆی چییەوە ڕووی داوە و زەرەر و زیانەکەشم دیار نییە".