عێراق گرێبەستی وەبەرهێنانی نەوت لەگەڵ کۆمپانیایەکی چینی واژۆ دەکات

ئاڤا نیوز

 

بە مەبەستی وەبەرهێنان لە سێکتەری نەوت و غاز، حکومەتی عێراق و کۆمپانیایەکی چینی گرێبەستێکی نوێ واژۆ دەکەن.

 

ڕاگەیێنراوی فەرمی: نووسینگەی سەرۆکوەزیرانی عێراق ڕایگەیاند: کۆمپانیای 'مەسافی جەنوب'ـی سەر بە وەزارەتی نەوت و کۆمپانیای 'چاینا ناشیۆناڵ کێمیکاڵ ئینێرجی'ـی چینی، گرێبەستی پڕۆژەی پاڵاوگەی فاویان بە قەبارەی بەرهەمهێنانی 300هەزار بەرمیل نەوتی ڕۆژانە واژۆ کرد.

 

زانیاریی زیاتر: پڕۆژەکە بە دوو قۆناغ جێبەجێ دەکرێت، قۆناغی یەکەم بریتییە لە پاڵاوتنی نەوت و قۆناغی دووەمیش دروستکردنی کۆمەڵەیەکی پترۆکیمیاوییە لەگەڵ بنیادنانی وێستگەیەکی کارەبا بە هێزی دوو هەزار مێگاوات.

 

ئەوەش بزانە: لە چوارچێوەی پڕۆژەکەشدا، ئەکادیمیای فاو بۆ تەکنەلۆجیای پاڵاوگە دروست دەکرێت، ئامانج لێی ڕاهێنانی پێنچ هەزار کارمەندی عێراقییە کە لە ئایندەدا سەرپەرشتیی پاڵاوگەکە دەکەن.