لە كابینەی نۆدا هەشت هەزار تۆن پەتاتە هەناردە كراوە

ئاڤا نیوز

لە کابینەی نۆیەم و بۆ یەکەمجار لە هەرێمی کوردستان، پەتاتە هەناردەی دەرەوەی وڵات کرا و بەرهەمهێنانی زیاد کرا.

 

لێدوانی فەرمی: هیوا عەلی، گوتەبێژی وەزارەتی کشتوکاڵ بە ئاڤا نیوزی گوت: کاری زۆر کراوە بۆ پێشخستنی سێکتەری بەرهەمهێنانی پەتاتە، لە 15 بۆ 20 ساڵی ڕابردوو پێداویستی تەواوی ناوخۆمان نەبوو، بەڵام ئێستا ڕێژەی بەرهەم بە شێوەیەکی بەرچاو بەرزبووەتەوە.

لە لایەکی دیکەوە: سەرۆکوەزیران بارزانی لە ڕۆژی 12ی ئایاری ئەمساڵ ڕایگەیاند: لە هەرێمی کوردستان  پەرەمان بە کشتوکاڵ داوە، بۆ نموونە بەرهەمهێنانی پەتاتە لە کوردستان پێش ئەم کابینەیە 25 هەزار تۆن بوو، ئێستا  گەیشتووەتە 800 هەزار تۆن.

ژمارەکان وا دەڵێن: لە ساڵی 2023ـدا 86هەزار و 453 دۆنم زەوی بە پەتاتە داچێنراون و 800 هەزار تۆن بەرهەمی هەبووە، لە کابینەی نۆیەمدا هەشت هەزار تۆن بۆ ئیمارات و سعوودیە نێردراون، چەند وڵاتێکی دیکەش داوایان کردووە

 

ئەوەی پێویستە بیزانیت: ڕۆژی حەوتی ئابی 2023، گرێبەستێک بۆ هەناردەکردنی بەرهەمی پەتاتەی جووتیارانی هەرێمی کوردستان بۆ ئیمارات، لە نێوان دوو کۆمپانیای خۆماڵی و کۆمپانیایەکی ئیماراتی واژۆ کرا.