بەرەی تورکمانی گومانی لە ئاگرەکەی بازاڕی خانی کەرکووک هەیە

ئاڤا نیوز

 

ڕاوێژکاری سەرۆکی بەرەی تورکمانی ڕەتی دەکاتەوە ئاگرەکەی بەیانی ئەمڕۆی 'بازاڕی خان'یی کەرکووک، بەهۆی شۆرتی کارەبا بوو بێت و دەڵێت: " ئاگرەکە دەستی لەپشتەوەیە."

 

چیرۆکی سەرەکی: بەرەبەیانی ئەمڕۆ، ئاگر لە دووکانەکانی خانی قیردار و خانی ئاوچی نزیک قەڵای کەرکووک کەوتەوە، زیاتر لە 130 دووکان سوتان، سەرەتا وا بڵاوکرایەوە بەهۆی شۆرتی کارەباوە ئاگرەکە دروست بووە.

 

لێدوانی فەرمی: ئەحمەد ڕەمزی، ڕاوێژکاری سەرۆکی بەرەی تورکمانی بە ئاڤا نیوزی گوت: "ناکرێت خانی ئاوچی ئاگر بگرێت و پاش چارەکێک خانێکی تری بەرامبەری بەهەمان شێوە ئاگر بگرێت، ئەو کەسانەی ئاگرەکەیان کردووەتەوە سەرەتا ئامێری ئینتەرنێتەکەیان سوتاندووە، چونکە هەموو دووکاندارەکان کامێرای چاودێرییان هەیە و بە ئینتەرنێتەوە بەستراونەتەوە."

 

زانیاریی زیاتر: "خانی قیردار هەواکێشی هەیە و لەوێوە ئاگڕ فرێدراوەتە نێو خانەکەوە، دواتر بەشێکی زۆری دووکانەکان ئاگریان گرتووە"،ئەحمەد ڕەمزی وای گوت.