پەرلەمانتارێک: لەکاتی دەنگدان بە سەرۆکی پەرلەمان هەندێک پەرلەمانتار وێنەی دەنگەکانیان دەگرت

ئاڤا نیوز

 

ئەندامێکی پەرلەمانی عێراق ڕەتیدەکاتەوە، لە ئایندەیەکی نزیکدا پەرلەمان بۆ هەڵبژاردنی سەرۆکی پەرلەمان کۆبوونەوە بکات.

لێدوانی فەرمی: حوسێن عەرەب، ئەندامی پەرلەمانی عێراق ڕایگەیاند: سالم عیساوی نزیکبوو لەوەی ببێتەوە سەرۆکی پەرلەمان، بەڵام دانیشتنەکە هەڵگیرا، ئەندامانی حزبەکەی حەلبووسی ڕێگرییان کرد دانیشتنەکە تەواوببێت، موحسین مەندەلاوی جێگری سەرۆکی پەرلەمان نزیکەی 20 خولەک چاوەڕێی کرد، ئەوکات دانیشتنەکەی هەڵگرت.

زانیاریی زیاتر: سالم عیساوی بەربژێری فراکسیۆنە سونییەکانە نەک خەمیس خەنجەر، هەندێک لە پەرلەمانتارەکانیش وێنەی کارتی دەنگدانەکەی خۆیان دەگرت. ئەو ئەندامەی پەرلەمانی عێراق وای گوتووە.

گۆشەیەکی دیکە: "بەم نزیکانە پەرلەمان کۆنابێتەوە بۆ هەڵبژاردنی سەرۆکی پەرلەمان، هێشتا بابەتی هەڵبژاردنی پێشوەخت لە ئارادایە، سوودانی بە لیستێکی جیاواز بەشداری هەڵبژاردن دەکات و سەدرییەکانیش کێشەیان نییە لە پشتگیریکردنی". ئەو پەرلەمانتارە وا دەڵێت.

وێنە گەورەکە: بەهۆی ناکۆکی نێوخۆیییەوە، شەش مانگە سوننەکان لەسەر بەربژێرێک بۆ سەرۆکایەتی پەرلەمان ڕێک نەکەوتوون، دوای ئەوەی محەممەد حەلبووسی بە بڕیارێکی دادگەی فیدراڵی لە پۆستەکەی دوورخرایەوە.