دامەزراندن له‌ کەرتی گشتی گرفت بۆ خەرجییەکانی حکومەت دروست ده‌كات

ئاڤا نیوز 

دوای ئەوەی یاسای بودجە گەیشتە پەرلەمانی عێراق، ئەندامانی لیژنەی یاسایی پەرلەمان هۆشداری دەدەن له‌وه‌ی دامەزراندن له‌كه‌رتی گشتیدا دەرئەنجامی مه‌ترسیداری لەسەر خەزێنەی ده‌وڵه‌ت دەبێت.

وێنە گەورەكە: عێراق یەکێکە لەو وڵاتانەی زۆرترین فەرمانبەری لە کەرتی گشتییدا هەیە، بەشێوەیەک کە سێ یەكی پارەی بودجەی گشتی بۆ مووچەی فەرمانبەران تەرخان دەکرێت.

لێدوانی فەرمی: سالم ئیبراهیم عه‌نکەبی، ئەندامی لیژنەی یاسایی لە پەرلەمانی عێراق ڕایگەیاند:دامەزراندن بێ پلانی پێشوەخته دەرئەنجامی نەرێنی لەسەر ئەدای دامودەزگاکانی دەوڵەت هەیە، به‌ تایبه‌ت کە جیاوازییەکی زۆر لە شایسته‌ داراییەکانی  فه‌رمانبه‌ران هه‌یه‌ لە  وەزارەتێکه‌وه‌ بۆ وەزارەتێکی دیکە سەرەڕای یەکسانیی ئەزموون و ساڵانی خزمەت له‌نێوانیاندا.

لە لایەكی دیكەوە: ئەنجوومەنی گشتیی خزمەتگوزاریی فیدراڵی بڵاویکردەوە، تا کۆتایی ئەمساڵ ژمارەی فەرمانبەرانی عێراق دەگاتە چوار ملیۆن کەس لەگەڵ بەردەوامبوونی دامەزراندن بۆ خاوه‌ن بڕوانامە باڵاكان و  یەکەمی زانكۆكان و  پسپۆڕانی پزیشکی.