پرسی هەڵبژاردنی سەرۆکی پەرلەمان دەچێتە وەرزێکی دیکەی یاسادانان

ئاڤا نیوز

 

نزیکەی دوو هەفتەی ماوە وەرزەی یاسادانان کۆتایی بێت، بەڵام تاوەکو ئێستا هیچ ڕێککەوتنێک نەکراوە و بەشێک لە پەرلەمانتاران دەڵێن، پرسەکە بۆ وەرزێکی دیکەی یاسادانان دوادەخرێت.

 

لێدوانی فەرمی:  ڤیان سەبری، پەرلەمانتاری عێراق بە ئاڤا نیوزی گوت: "سەرەڕای بوونی گفتوگۆکان، تاوەکو ئێستا هیچ ڕێککەوتنێک لەنێوان سوننەکان لەسەر پۆستی سەرۆکی پەرلەمان نەکراوە و ئەگەر دۆخەکە بەمجۆرە بێت، یەکلاکردنەوەی پرسەکە دوادەکەوێت بۆ وەرزی نوێی یاسادانان".

 

لەلایەکی دیکەوە: محەممەد زیادی، پەرلەمانتاری عێراق ڕایگەیاند، "دانیشتنی پەرلەمان بۆ هەڵبژاردنی سەرۆکەکەی بۆ دوای جەژنی قوربان دوادەخرێت بەهۆی ئەوەی نزیکەی 80 پەرلەمانتار گەشتی حەجیان کردووە و لەبەرامبەردا 45 پەرلەمانتاری پارتی تەقەدووم بایکۆتی دانیشتنەکان دەکەن".

 

ئەوەی پێویستە بیزانیت: پەرلەمانی عێراق لە سەرەتای ئەم مانگە تەمەنی یاسایی خۆی بۆ مانگێک درێژ کردەوە و دواتر کۆبووەوە بۆ هەڵبژاردنی سەرۆکەکەی، بەڵام بەهۆی ناکۆکیی لایەنە سوننەکان ئەو پرسە بە هەڵپەسێردراوی ماوەتەوە و لە نۆی مانگی داهاتووەوە، پشووی پەرلەمان دەست پێ دەکات.