نەجەف.. بەهۆی ئاوەڕۆوە زەنگی مەترسی لێدەدرێت

ئاڤا نیوز

بەڕێوەبەرایەتی ژینگەی نەجەف بانگەوازی بۆ چارەسەرکردنی ئەو سەرپێچیانە کرد كە لە وێستگە کۆنەکانی ئاوەڕۆدا ڕوودەدەن و هەموو پاشماوەکان تێیدا دەڕژێنە ناو ڕووباری فوراته‌وه‌، ئه‌مه‌ش زیانێكی ژینگەیی گەورە بە ئاوی ڕووبارەکە و تەندروستی هاووڵاتیانی پارێزگاکە ده‌گه‌یێنێت.

لێدوانی فەرمی: جەمال عەبد زەید، بەڕێوەبەری ژینگەی نەجەف ڕایگەیاند: سەرپێچی زۆر هەیە لە وێستگه‌كانی ئاوەڕۆ كە ئێستا کاردەکەن، لەوانەش ڕژانی ئاوەڕۆ بۆ ناو ڕووبارەکان بەبێ چارەسەرکردن، ئەمەش ئاوی ڕووبارەکان بەرەو پیسبوونی بایۆلۆجی دەبات.

باكگراوند: ماجید وائیلی ، پارێزگاری نەجەف پێشتر ڕایگەیاندبوو: كاركردن له‌ وێستگەی پاڵَاوتنی  دەریای نەجەف به‌رده‌وامه‌ كه‌وێستگه‌یه‌كی پاڵاوتنی سه‌رده‌میانه‌یه‌ و خزمەت بە 500 هەزار کەس دەکات .

زانیاریی زیاتر: کۆمپانیای ئیمتیسال  كه‌  جێبەجێکاری  پڕۆژەکەیه‌ ، جه‌ختی كرده‌وه‌ بەهۆی بارودۆخی وڵاتەوە له‌ماوه‌ی ڕابردوودا پڕۆژەی وێستگەکانی پاڵاوتن له‌شاری نه‌جه‌ف دواکەوتن، بەڵام ئێستا کارەکان بە خێرایی ده‌ڕۆن و لە ماوەیه‌كی نزیكدا تەواو دەبن.