سەرژمێریی ئەزموونیی دانیشتووان لە عێراق دەست پێ دەکات

ئاڤا نیوز

 

وەزارەتی پلاندانانی عێراق دەستپێکردنی سەرژمێریی ئەزموونیی دانیشتووان لە سەرجەم پارێزگاکانی عێراق ڕاگەیاند، بۆ دوو هەفتەش بەردەوام دەبێت.

 

وێنە گەورەکە: لەپێناو ئامادەکاری بۆ ئەنجامدانی سەرژمێریی گشتیی دانیشتووان لە سەرانسەری عێراق کە بڕیارە مانگی تشرینی دووەمی ئەمساڵ بەڕێوە بچێت، ئەمڕۆ هەینی 31-05-2024 سەرژمێریی ئەزموونی لە هەموو پارێزگاکانی عێراق و هەرێمی کوردستان دەستی پێ کرد.

 

ڕاگەیێنراوی فەرمی: وەزارەتی پلاندانانی عێراق ڕایگەیاند، "دەستپێکردنی چالاکییە ئەزموونییەکانی سەرژمێری لە سەرجەم پارێزگاکانی عێراق بە هەرێمی کوردستانیشەوە دەستی پێ کرد و بۆ ماوەی 14 ڕۆژ بەردەوام دەبێت".

 

زانیاری زیاتر: زیاتر لە 600 توێژەر لە سەرانسەری عێراق بەشدارن لەم ئەزموونەدا، نزیکەی 86 ناوچە و شار و گوند دەگرێتەوە.

 

ئەوەی پێویستە بیزانیت: سەرژمێریی گشتی لە 20-11-2024، لە تەواوی عێراق بە بەشداریی پێنج هەزار مامۆستا و فەرمانبەری کەرتی پەروەردەیی ئەنجام دەدرێت.

 

باکگراوند: کۆتا سەرژمێری لە عێراق بەبێ پارێزگاکانی هەرێمی کوردستان لە ساڵی 1997 ئەنجام دراوە، لەو کاتەوە ئەمە یەکەمین سەرژمێرییە کە بڕیارە ئەمساڵ ئەنجام بدرێت.