پەکەکە سێ کادیری یەکێتی لە شێلادزێ دەستبەسەر دەکات

ئاڤا نیوز

 

چەند ڕۆژێكە سێ گەنج لە سنووری ناحیەی شێلادزێ ونبوونە و میدیای فەرمی یەکێتیش بە کادیری حیزبەکەیان ناویان دەبات و دەڵێت "بێسەروشوێنن"، بەڵام بەپێی سەرچاوەیەک ئەو گەنجانە لەلایەن پەکەکەوە دەستبەسەر کراون.

 

چیرۆکی سەرەکی: لە ڕۆژی 09-06-2024ـەوە، سێ گەنج بەناوەکانی دیار نەزمی، هێمن تەیمووس و سەفین عەلی کە خەڵکی کۆمەڵگەی سیریێی سەر بە ناحیەی شیلادزێن، بە ئۆتۆمبێلی خۆیان لەماڵەوە چوونەتە دەرەوە و دیارنەماون.

 

زانیاریی تایبەت: بەپێی ئەو زانیارییانەی لە سەرچاوەیەکی ئاگادارەوە دەست ئاڤا نیوز کەوتوون، "ئەو سێ گەنجە لەلایەن پەکەکەوە دەستگیرکراون و بە درێژایی ئەو مایەوە لای ئەوان ڕاگیراون".

 

قووڵتر: هێزە ئەمنییەکان و خەڵکی ناوچەکە هەڵمەتێکی گەڕان و بەدواداچوونیان دەستپێکردووە بۆ دۆزینەوەیان، بەڵام دواتر چەکدارانی پەکەکە بە نامە کەسوکاری ئەو گەنجانەیان ئاگادار کردووەتەوە کە لای ئەوان دەستبەسەرن، هۆشداریشیان پێداوە کە نابێت ئەم هەواڵە بڵاو بکەنەوە.

 

ئەوەی ئێستا ڕوودەدات: پەکەکە ئامادە نییە ئەو سێ گەنجە ئازاد بکات و بڕیارە لە کاتژمێرەکانی ئایندەدا نوێنەرێک لە کەسوکاریان چاویان بە چەکدارانی پەکەکە لە ناوچەکە بکەوێت بۆ گفتوگۆکردن لەسەر ئازادکردنیان.

 

گۆشەیەکی دیکەی دیمەنەکە: پێش ئەوەی ئاشکرا بکرێت کە ئەو گەنجانە لەلایەن پەکەکەوە دەستگیرکراون، میدیای فەرمی یەکێتی بڵاوی کردەوە کە ئەو سێ گەنجە کادیری ئەوانن و لە سنووری بامەڕنێ بێسەروشوێن کراون.

 
ئەمەش بزانە: بەهۆی بوونی پەکەکەوە لە سنووری ئامێدی و ناوچە سنووریەکانی پارێزگای دهۆک بە گشتی، هاونیشتمانیان ناتوانن بچنەوە سەر گوندە چوڵکراوەکانیان کە ژمارەیان زیاتر لە 200 گوندە، بەردەوام مەترسیی هێرشی تورکیا و هەڕەشەی پەکەکەیان لەسەرە، یەکەمجاریش نییە خەڵکی ئەو ناوچانە دەستگیر دەکرێن.