پۆلیسی ئیتاڵیا دۆزینەوەی 12 تەرمی دیکەی کۆچبەرانی ڕاگەیاند

ئاڤا نیوز

پۆلیسی پاسەوانی کەناراوەکانی ئیتاڵیا ڕایگەیاند 12 تەرمی دیکەیان دۆزیونەتەوە و ژن و منداڵیشیان تێدایە.

وێنە گەورەکە: پۆلیسی ئیتاڵیا ڕاگەیێنراوێکی لەبارەی کۆچبەران بڵاوکردووەتەوە، دەڵێت سەرەتای ئەم هەفتەیە بەلەمێكی كۆچبەران لە كەناراوەكانی باشووری ئیتاڵیا نوقم بووە و زیاتر لە 60 كەس بێسەروشوێن بوون، لەنێویاندا 26 یان منداڵ بوون. 

ڕاگەیێنراوی فەرمی: لە دەریای ئایۆنی 12 تەرمی دیکە دۆزراونەتەوە و ژن و منداڵیشیان تێدایە، پێشتر هەشت تەرم دۆزرابوونەوە، بەمپێیە ئێستا ژمارەی گیانلەدەستدانی پشتڕاستکراوە 20 کەسە.

ئەوەی پێویستە بیزانیت: ژمارەیەکی زۆر لە کۆچبەرانی سەر بەمەلەکە کوردی باشوور، ڕۆژھەڵات و ڕۆژئاوای کوردستان بوون، لە هەرێمی کوردستانەوە تائێستا خانەوادەی 21 کۆچبەر پەیوەندییان بە حکومەتی هەرێمی کوردستانەوە کردووە  و داوای هاوکارییان لێ کردوون، بۆ ئەم مەبەستەش تیمێکی حکومەت لەو وڵاتەیە.

باکگراوند: هەر ئەمشەو پێشەوا هەورامانی، گوتەبێژی حکومەتی هەرێمی کوردستان بە ئاڤا نیوزی گوت: حکومەتی ئیتاڵیا بەفەرمی گیانلەدەستدانی 20 کۆچبەری پێڕاگەیاندوون؛ شەش پیاو، شەش ئافرەت و هەشت منداڵ.