گوتەبێژی حکومەت زانیاری لەبارەی چارەنووسی کۆچبەرە بێسەروشوێنەکان ئاشكرا دەکات

ئاڤا نیوز


گوتەبێژی حکومەت زانیاری لەبارەی چارەنووسی کۆچبەرە بێسەروشوێنەکانی کەناراوەکانی ئیتاڵیا ئاشكرا دەکات و ڕایدەگەیێنێت، 11 کەس رزگارکراون و حەوتیان کوردن. مردنی 20 کۆچبەریش یەکلابووەتەوە؛ شەش پیاو، شەش ئافرەت و هەشت منداڵ.

وێنە گەورەکە: لەسەر ڕاسپاردەی سەرۆکوەزیران بارزانی، تیمێکی حکومەتی هەرێمی کوردستان بۆ یارمەتیدانی کۆچبەرە ڕزگاربووەکان و گەڕاندنەوەی تەرمی کۆچبەرە خنکاوەکان لە ئیتاڵیایە، وەزارەتی ناوخۆ و فەرمانگەی پەیوەندییەکانی دەرەوە ڕاسپێردراون هەرچی پێویست بێت بۆ یارمەتیدانی کۆچبەرە ڕزگاربووەکان و گەڕاندنەوەی تەرمی کۆچبەرە خنکاوەکان بکرێت.

 

لێدوانی فەرمی: پێشەوا هەورامانی، گوتەبێژی حکومەتی هەرێمی کوردستان بە ئاڤا نیوزی گوت: بۆ گەڕاندنەوەی تەرمی قوربانییەکان هەموو ڕێوشوێنێکی پێویست دەگیرێتەبەر و لەسەر ئەرکی حکومەت کار بۆ گەڕاندنەوەیان دەکرێت، ئەمەش چەند ڕۆژێکی پێویستە تاوەکو دۆسیەکانیان لە دادگای ئیتاڵیا یەکلایی دەبێتەوە.

 

زانیاریی زیاتر:  تیمی حکومەت لە ئیتاڵیا سەردانی نەخۆشخانە و دادگایان کردووە، ئەوانەشیان ڕزگاربووەکانیشیان بینیوە کە ژمارەیان 11 کەسە و حەوتیان کوردن. لەبارەی ژمارەی قوربانییەکانیشەوە پێشەوا هەورامانی گوتی حکومەتی ئیتاڵیا بەفەرمی گیانلەدەستدانی 20 کۆچبەری پێڕاگەیاندووین؛  شەش پیاو، شەش ئافرەت و هەشت منداڵ.

باکگراوند: بەهۆی تێکشکانی دوو بەلەمەکەی کۆچبەران لە کەناراوەکانی ئیتاڵیا کە زیاتر لە 40 کۆچبەریان کورد بوون، تاوەکو کەسوکاری 21 کۆچبەر لە هەرێمی کوردستانەوە پەیوەندییان بە حکومەتەوە کردووە و داوای هاوکارییان کردووە.