پنتاگۆن ڕێگە بە ئۆکراینا دەدات بە مووشەک هێرش بکاتە سەر ڕووسیا

ئاڤا نیوز 

بە بڕیاری وەزارەتی بەرگریی ئەمریکا، بۆ لەمەودوا ئۆکراینا دەتوانێت مووشەکی دوورمەودا بۆ بە ئامانج گرتنی قوڵایی خاكی ڕووسیا بەکاربهێنێت.

بۆچی گرنگە: بەم بریارە ئۆکراینا دەستکراوە دەبێت لەبەزاندنی سنوورەکانی ڕووسیا. 

لێدوانی فەرمی: پات ڕایدەر، سکرتێری رۆژنامەوانی پنتاگۆن گوتی: رووسیا لە ناوەوەی سنوورەکانییەوە ئۆکراینا دەپێكێت، وا مامەڵە دەکات ناوچەیەکی سەلامەت بێت، کە دەبینین ڕووسیا سنوور دەبەزێنێت، ئەوە بە مافی ئۆکراینا دەبینین کە بەرگری لە خۆی بکات.

لە لایەکی دیکەوە: جۆن کێربی، گوتەبێژی ئاسایشی نیشتیمانی ئەمریکا پێی وایە، دەبێت بە زووترین کات چەک و تەقەمەنی پێویست بۆ ئۆکراینا دابین بکرێت، بۆ ئەمەش ئەمریکا بە سەدان باری مووشەکی پاتریۆت بۆ ئۆکراینا دەنێرێت.

ئەوەی پێویستە بیزانیت: لە سەرەتای لەشکرکێشی ڕووسیا بۆسەر ئۆكراینا لە ساڵی 2022، ئەمریکا ڕێگەی بە ئۆکراینا نەدەدا ئەو چەکانەی کە بۆی دابین کردووە بۆ لێدانی ئامانجەکانی ناو ڕووسیا بەکاربهێنێت.