پۆند و بەنداوە نوێیەکان بوونەتە هۆی بووژانەوەی ئاوی ژێرزەوی

ئاڤا نیوز

 

بەڕێوەبەری ئاوی هەرێمی کوردستان دەڵێت، دۆخی ئاوی ژێرزەوی لە قوشتەپە بەراورد بە ناوچەکانی دیکە لە دۆخێکی خراپدایە و قوڵترین بیر لەم ناوچەیە لێدراوە، بەڵام پۆند و بەنداوەکان لە هەندێک ناوچەدا بوونەتە هۆی بووژانەوەی ئاوی ژێرزەوی. 

 

وێنە گەورەکە: ساڵانە لە وەرزی هاویندا بەهۆی دابەزینی ئاستی ئاوی ژێر زەوی کێشە بۆ هەندێک گەڕەک لە سەرجەم شارەکانی هەرێمی کوردستان دروست دەبێت.

 

لێدوانی فەرمی: ئاری ئەحمەد، بەڕێوەبەری گشتیی ئاوی هەرێمی کوردستان بۆ ئاڤا نیوز قسەی کردووە دەڵێت: لەسەر ئاستی هەرێمی کوردستان قووڵترین بیری ئاوی خواردنەوە لە قوشتەپە لێدراوە کە زیاتر لە 700 مەتر قوڵە، ئاستی ئاوی ژێرزەوی لە شارەکان لە شوێنێک بۆ شوێنێکی دیکە دەگۆڕێت، لە هەولێر تەنیا لەناوچە شاخاوییەکان قوڵی بیر دەگاتە 100 مەتر.

 

زانیاریی زیاتر: لە پارێزگای سلێمانی بەهۆی ئەوەی لە ناوچەی شاخاوییە نزیکە، لەناو سەنتەری شار قوڵایی بیر دەگاتە 100 مەتر، لە سەنتەری پارێزگای دهۆک 150 مەتر و لەو پارێزگایە تەنیا قەزای بەردەڕەش گرفتی هەیە قوڵی بیر تاوەکو 200 مەتر دەڕوات.

 

لەلایەکی دیکە: پێشووتر ڕێزان سەعدی، بەڕێوەبەری ئاوی دەوروبەری هەولێر بە ئاڤا نیوزی ڕاگەیاند: دروستکردنی پۆند و بەنداوە نوێیەکان لەلایەن حکومەتی هەرێمی کوردستان بووەتە هۆی بووژانەوەی ئاوی ژێرزەوی لە هەندێک ناوچە.

 

ئەوەی پێویستە بیزانیت: لە هەرێمی کوردستان لەڕێگەی پێنج هەزار و 470 بیری ئاوی خواردنەوە و 91 پڕۆژە، ئاوی خواردنەوە بۆ هاووڵاتییان دابین دەکرێت.