لاهوور شێخ جەنگی چاوەڕێی دادگەی فیدراڵییە

ئاڤا دیجیتاڵ

لاهوور شێخ جەنگی، چاوەڕێی بڕیاری دادگەی فیدراڵی دەکات بۆ یەکلاییکردنەوەی ئەو سکاڵایەی لەدژی پەرلەمانی کوردستان تۆمارکراوە، تاوەکو هێزێکی سیاسیی نوێ ڕابگەیێنێت.

بۆچی گرنگە: دروستبوونی حیزبێکی نوێ لە هەناوی یەکێتیی نیشتمانیی کوردستانەوە، یەکەم جار نییە و ئەگەر ئەم حیزبەش دروست بکرێت دەنگی یەکێتی زیاتر پەرت دەبێت و باڵانسی هێز لە کوردستان دەگۆڕێت .

چاوەڕوانییەکان: کاتی راگەیاندنی حیزبەکە وابەستەی یەکلاییکردنەوەی ئەو سکاڵایەیە کە لەدژی یاسای پەرلەمان تۆمارکراوە، تاوەکو کاتی هەڵبژاردنیش دوابکەوێت، ڕاگەیاندنی حیزبەکەی لاهوور شێخ جەنگی دوادەکەوێت.

لێدوانی فەرمی: لاوەند جەلال، ڕاوێژکاری یاسایی پەرلەمانی کوردستان و کەسی نزیک لە لاهوور شێخ جەنگی بە ئاڤا نیوزی گوت: "ئێمە بۆ دژایەتیکردنی هیچ حیزبێک نەهاتووین و پەیوەندیشمان لەگەڵ حیزبە جیاوازەکاندا دەبێت".

زانیاریی زیاتر: ڕۆژی 26-09-2023 لاھوور شێخ جەنگی لە تۆمارێكی ڤیدیۆییدا ڕایگەیاند "دەمەوێت پێتان ڕابگەیێنم وەک یەكەم هەنگاومان بەشداری لە هەڵبژاردنی داهاتووی پەرلەمانی كوردستان دەكەین و لیستێكی گەلپەسەند ڕادەگەیەنین".