دوای 20 ساڵ کێشەی ئاوی چەمچەماڵ چارەسەر دەکرێت

ئاڤا نیوز

 

لەسەر فەرمانی سەرۆکوەزیران بارزانی، ئەمڕۆ واژۆ لەسەر جێبەجێكردن و كارپێكردنی ئاوی گۆپتەپە - چەمچەماڵ دەكرێت، گرفتێكی ڕیشەیی دەڤەری چەمچەماڵ چارەسەر دەكات.

 

وێنە گەورەکە: 11 ساڵە بڕیار لەسەر دروستکردنی پرۆژەی گۆپتەپە دراوە، بەڵام تاوەکو ئێستا جێبەجێ نەکراوە و قەزای چەمچەماڵ پرۆژەی ئاوی نییە، لە ساڵی 2013ەوە کارەکانی پرۆژەکە بەهۆی قەیرانی دارایی ڕاگیراوە.

 

بۆچی گرنگە: ماوەی زیاتر لە 20 ساڵە خەڵکی قەزای چەمچەماڵ کێشەی ئاویان هەیە و زۆربەی کاتەکان بۆ دابینکردنی ئاو پەنا بۆ کڕێنی دەبەن و ئەم هەنگاوەی سەرۆکوەزیران بارزانی کۆتایی بەو کێشەیە دێنێت.

 

لێدوانی فەرمی: سەرچاوەیەک لە وەزارەتی شارەوانی و گەشتوگوزاری حکومەتی هەرێمی کوردستان بە ئاڤا نیوزی ڕاگەیاند، لەسەر فەرمانی سەرۆکوەزیران بارزانی، پرۆژەی ئاوی گۆپتەپە – چەمچەماڵ دەچێتە بواری جێبەجێکردنەوە، بە دروستبوونی پرۆژەکە 480 هەزار کەس سوودمەند دەبن و کێشەی کەمئاوییان چارەسەر دەبێت.

 

زانیاریی زیاتر: ئەمڕۆ وەزیری شارەوانی و گەشتوگوزار، لەگەڵ كۆمپانیای جێبەجێكار، واژۆ لەسەر پرۆژەی دیزاین و جێبەجێكردن و كارپێكردنی ئاوی گۆپتەپە - چەمچەماڵ دەكرێت كە پرۆژەیەكی ستراتیجیی گەورەی حكومەتی هەرێمی كوردستانە و گرفتێكی ڕیشەیی قەزای چەمچەماڵ چارەسەر دەكات.

 

ئەمەش بزانە: پرۆژەكە لەلایەن بەڕێوەبەرایەتیی گشتیی ئاو و ئاوەڕۆی سەر بە وەزارەتی شارەوانی و گەشتوگوزار جێبەجێ دەكرێت و لە ماوەی ساڵێكدا تەواوی پرۆژەكە تەواو دەبێت و خەڵكی دەڤەری چەمچەماڵ سوودمەند دەبن لەو خزمەتگوزارییە.