عێراق: پەکەکە‌مان لە ناوچە سنوورییەکان لاوازكردووه‌

ئاڤا نیوز  

فەرماندەیی هێزەکانی پاسەوانی سنووری سەر بە وەزارەتی ناوخۆی عێراق ڕایدەگەیێنێت، لە ناوچە سنوورییەکان توانیویانە پەکەکە لاواز بکەن و خاڵەکانی ئۆپۆزسیۆنی ئێرانیش هه‌ڵبگرن.

وێنە گەورەکە: عێراق لەگەڵ هەر یەک لە ئێران و تورکیا ڕێککەوتووە و یاداشتی لێکتێگەیشتنی هەیە لەنێوانیاندا، جگە لەوەی لیژنەی ئەمنیی هاوبەش هەیە بۆ پاراستنی سنوورەکانیان.

لێدوانی فەرمی: لیوا محەممەد عەبدولوەهاب، فەرماندەی هێزەکانی پاسەوانی سنووریی عێراق ڕایگەیاند: لەماوەی دووساڵی ڕابردوودا کاری مەزنمان لەسەرسنوورەکانی ئێران و عێڕاق کردووە، هەماهەنگی لەگەڵ لایەنی تورکیا کراوە بۆ دامەزراندنی ناوەندێکی هەماهەنگی هاوبەش.

زانیاریی زیاتر:"کارمان لەسەر لاوازکردنی ئەو گرووپە چەکداریانە کردووە، لێکتێگەیشتنێکی باشیشمان لەگەڵ حکومەتی سلێمانی و لایەنی ئێرانی هەیە بۆ کۆنترۆڵکردنی ئەو ناوچانە".

باکگراوند: عێراق بەدرێژایی 362 کیلۆمەتر سنووری لەگەڵ تورکیا هەیە، لەگەڵ کۆماری ئیسلامی ئێرانیش هەزار و 493 کیلۆمەتر سنووری هەیە.