عێراق ڕەتی دەکاتەوە حەماس داوای لێ کردبێت بارەگا لە بەغدا بکاتەوە

ئاڤا نیوز

حکومەتی عێراق ڕەتی دەکاتەوە بزووتنەوەی حەماس داوای کردنەوەی بارەگا یان گواستنەوەی سەرکردەکانی بۆ بەغدا کردبێت.

وێنە گەورەکە: پێشتر میدیاکانی عێراق بڵاویان کردەوە، حەماس نووسینگەیەکی تایبەت لە بەغدا دەکاتەوە و ڕەنگە بەشێک لە سەرکردەکانیش بێنە بەغدا، بەڵام حکومەتی عێراق ڕەتی دەکاتەوە.

لێدوانی فەرمی: سەرچاوەیەک لە نووسینگەی سەرۆکوەزیرانی عێراق بە ئاڤا نیوزی گوت: "حەماس هیچ داوایەکی فەرمی لە حکومەتی عێراق نەکردووە بۆ گواستنەوەی سەرکردەکانی و کردنەوەی بارەگا لە بەغدا، ئەوەی لەوبارەیە باس دەکرێت دوورە لە ڕاستی". 

ئەوەی پێویستە بیزانیت: پێشتر قەتەر وەک گوشارێک هەڕەشەی ئەوەی لە بەرپرسانی حەماس کردبوو، ئەگەر بێت و پڕۆژەی ئاگربەست لەگەڵ ئیسرائیل پەسەند نەکەن ئەوا لەو وڵاتە دەریان دەکات، بەڵام سەرەتای ئەم هەفتەیە مەجید ئەنساری، وەزیری دەرەوەی قەتەر دووپاتی کردەوە لەوەی بزووتنەوەی حەماس لە دەوحە دەمێنێتەوە.