ئاگر لە گوندێكی ئامێدی كەوتووەتەوە و توركیا و پەكەكە یەكتر تۆمەتبار دەكەن

ئاڤا نیوز

ئاگر لە سنووری گوندێکی ئامێدی کەوتووەتەوە، وەزارەتی بەرگریی تورکیا دەڵیت گەریلایەکانی پەکەکە دارستانەکان دەسووتێنن و پەکەکەش هێرشەکانی تورکیا بە هۆکار دەزانێت.

زانیاریی بەدەستهاتوو: بەبێی زانیارییەکانی ئاڤا نیوز، لە سنووری گوندی دەرگەلێ لە دەڤەری بەرواری باڵای سەر بە قەزای ئامێدی لە سێ ڕۆژی ڕابردوودا شەڕێکی سەخت لەنێوان پەکەکە و تورکیادا ڕوویداوە و بەشێک لە هاووڵاتیان بە ناچاری ماڵ و حاڵیان جێهێشتووە.

ڕاگەیێنراوی فەرمی: وەزارەتی بەرگریی تورکیا ڕایگەیاند: "گەریلایەکانی پەکەکە هاووڵاتییانی سڤیلی دەکەنە قەڵغان، هێرشیان کردووەتە سەر یەکەکانمان، بۆ ئەوەی شوێنەکانیان دیار نەبێت دەستیان کردووە بە سووتاندنی دارستانەکان". 

زانیاریی زیاتر: "گەریلاکانی پەکەکە هەوڵ دەدەن دانیشتووانی خۆجێیی ناوچەکە فریو بدەن بەوەی کە ئەو شوێنانەی ئاگریان تێبەرداوە بەهۆی تەقەی سوپای تورکیاوە سووتاون". وەزارەتی بەرگریی تورکیا وادەڵێت.

بۆچوونی لایەنی بەرامبەر: پەکەکە باس لەوەدەکات "لە سێ ڕۆژی ڕابردوودا چەندین چالاکییان لە سنووری دەرگەلێ دژ بە تورکیا هەبووە و سەربازێک کوژراوە، بەهۆی هێرشەکانی تورکیاوە ئاگر لە دارستانەکان کەوتووەتەوە و تورکیا هەوڵی تێکدانی سرووشتی ناوچەکە دەدات".