وەزارەتی ناوخۆی عێراق: بازاڕەکانی هەولێر و دهۆک و کەرکووک لەلایەن پەکەکەوە سووتێنراون

ئاڤا نیوز

وەزارەتەکانی ناوخۆی هەرێمی کوردستان و عێراق لە کۆنگرەیەکی ڕۆژنامەوانیدا، لەبارەی سووتاندنی  بازاڕەکانی لەنگە و قەیسەری هەولێر و چەلێی دهۆک و قەیسەری کەرکووک ڕایانگەیاند تۆڕێکی پەکەکە سووتاندوونی.

لێدوانی فەرمی: لە کۆنگرە ڕۆژنامەوانییەکەدا هەرسێ تۆمەتبارەکە هێنرابوونە بەردەم کامێراکان، لەبارەی ناسنامەیان هێمن میرانی، بەڕێوەبەری گشتیی دیوانی وەزارەتی ناوخۆ ڕایگەیاند: تاوانکارەکان لێرەن، یەکێکیان سەرپەرشتیار بووە بە ناوی هونەر فەخرەدین ئەحمەد، کارمەندی یەکەی 70ی هێزی پێشمەرگەیە، ئەوەی دیکەیان ناوی محەممەد نەجات حەسەنە و ئەفسەرە لە دژەتیرۆری سلێمانی، هەر سێ تاوانکارەکە لەلایەن پەکەکەوە بەکارهێنراون" .ئاماژەی بە ناسنامەی تۆمەتباری سێیەم نەکرد.

زانیاریی زیاتر: "کادیری ئەمنی و سەربازیی پەکەکە لە سووریا و تورکیا و قەندیلەوە هاتوون و لە سلێمانی و سەنگەسەر و کفری ڕاهێنانیان [بە تۆمەتبارەکان] کردووە بۆ ئەوەی ئەو کارە تیرۆریستیانە ئەنجام بدەن، پلانی زۆر مەترسیداریان هەبووە گورزی کوشندەتر بدەن، بە هەوڵی هاوبەشی هەردوو حکومەت توانرا ئەو گرووپە دەستگیر بکرێن، هەرسێ تاوانکارەکە لە کەرکووک و دیالە دەستگیرکراون. هێمن میرانی وای گوت.

 

لەلایەکی دیکەوە: میقداد میری، گوتەبێژی وەزارەتی ناوخۆی عێراق ڕایگەیاند: ئەوانەی دەستگیر کراون سەر بە پەکەکەن و بازاڕەکانی هەرێمی کوردستان لەلایەن پەکەکەوە سووتێنراون، تەنانەت هەوڵیشیان داوە هێرش بکەنە سەر بازاڕی نیشتمان لە هەولێر. لە کۆنگرە ڕۆژنامەوانییەکەدا زیانی سووتانی بازارەکان بە 300 ملیۆن دۆلار خەمڵێنرا.

 

وردەکاریی زیاتر: تۆمەتبارەکان بازاڕی چەلێی دهۆک و لەنگەی هەولێر و چەند بازاڕێکی دیکەیان سووتاندووە، هەوڵەکان بۆ تێکدانی سەقامگیریی هەولێر و کەرکووک و بەغدا بووە، کۆمەڵێک ڕێکاریان پێش سووتاندنی شوێنەکان گرتووەتەبەر. میقداد میری وای گوت.

 

باکگراوند: لە ماوەی سێ مانگی ڕابردوودا، چەندجارێک ئاگر لە بازاڕەکانی قەیسەری و لەنگە لە هەولێر، بازاڕی قەیسەری کەرکووک و بازاڕی چەلێی دهۆک کەوتەوە و لە هەر بازاڕێکدا سەدان دووکان سووتان.