عێراق: پەکەکە هەوڵی تەقاندنەوەی بۆری نەوتی کەرکووک – جەیهانی داوە

ئاڤا نیوز 

وەزارەتی ناوخۆی عێراق دوای دەستگیرکردنی تۆڕێکی سەر بە "ڕێکخراوی پەکەکە"، پلان و بەرنامەکانی ئەو ڕێکخراوە ئاشکرا دەکات، لەنێویشیاندا تەقاندنەوەی بۆری نەوتی کەرکووک – جەیهان.

وێنە گەورەکە: لەسەر دەستگیرکردنی تۆڕێکی تاوانکاری، وەزارەتی ناوخۆی حکومەتی هەرێمی کوردستان و وەزارەتی ناوخۆی حکومەتی عێراق کۆنگرەیەکی ڕۆژنامەوانییان ئەنجامدا.

 
لێدوانی فەرمی: عەمید میقداد میری، گوتەبێژی وەزارەتی ناوخۆی عێراق بە ئاڤا نیوزی ڕاگەیاند: ئەو تۆڕەی پەکەکە، جیا لە سووتاندنی بازاڕ و مۆڵەکانی شارەکانی هەرێمی کوردستان و عێراق و لێدان لە بەرژەوەندییە ئابوورییەکان پلانی هێرشکردنە سەر وڵاتانی دراوسێی عێراقیشیان هەبووە.

زانیاریی زیاتر: "پەکەکە ویستوویەتی ناوچەی نەوتییەکانی لە کەرکووک بکاتە ئامانج، هەوڵی ئەوەشیان داوە هێڵی نەوتی کەرکووک - جەیهان بکەنە ئامانج و بیتەقێننەوە". گوتەبێژەکەی وەزارەتی ناوخۆی عێراق وای گوت.

ئەوەی پێویستە بیزانیت: بۆری نەوتی کەرکووک – جەیهان، درێژییەکەی 350 کیلۆمەترە، لە ماوەی رابردوودا لە سنووری پارێزگاکانی کەرکووک، سەڵاحەددین و نەینەوا لەلایەن چەکدارانی داعشەوە زیانی پێگەیێنرابوو، لە سەرەتای مانگی پێنجی ئەمساڵ کاری نۆژەنکرنەوەی لەلایەن وەزارەتی نەوتی عێراقەوە تەواوکراو بەشێوەیەکی ئەزموونیش تاقیکرایەوە.