ڕێکنەکەوتنی عێراق و تورکیا مەترسی لەسەر زەوییە کشتوکاڵییەکان دروست دەکات

ئاڤا دیجیتاڵ 

 

عێراق کێشەی بەردانەوەی ئاو لەگەڵ تورکیا چارەسەر نەکات، کارەساتی وشکەساڵی لە وڵاتەکە دروست دەبێت و بەشێکی زۆری زەوییە كشتوکاڵییەکان بەبیابان دەبن.

 

چیرۆکە سەرەکییەکە: نزیکەی ساڵێکە تورکیا ئاوی دیجلە و فوراتی لەسەر عێراق گرتووەتەوە، بەمەش لەدوای وەرزی بەهار، وشکەساڵی عێراق دەگرێتەوە ڕووبەری بیابان زیاتر دەکات، سەدان خێزان لە ناوچەکانی خۆیان ئاوارە دەبن و زیانی گەورە بە کەرتی کشتوکاڵی، سامانی ئاژەڵ و ماسی دەگات.

 

زانیاریی زیاتر: لە تورکیا دوو ڕووبار و لە ئێران چوار ڕووباری گەورە هەڵدەقوڵێن و بە عێراقدا تێپەڕدەبن، کاریگەریی ڕووبارەکانی تورکیا لەسەر کۆگاکردنی ئاو لە عێراق 70%ـیە لەگەڵ ئێران 35%ـە، چونکە ڕووبارەکانی ئێران وەرزین و بەردەوام نین.

 

لێدوانی فەرمی: "ئەگەر عێراق بیەوێت لە قەیرانی وشکەساڵی ڕزگاری بێت، پێویستە بەزووترین کات لەگەڵ تورکیا بگاتە ڕێککەوتن، بۆ ئەوەی هاوشێوەی ساڵی ڕابردوو زەوی وڵاتەکە بەبیابان نەبێت." زۆزان کۆچەر، جێگری سەرۆکی لیژنەی کشتوکاڵ لە ئەنجوومەنی نوێنەرانی عێراق وای بە ئاڤا نیوز گوت.

 

ژمارەکان وادەڵێن: لە هاوینی ڕابردوو کۆگاکردنی ئاو لە عێراق تەنیا حەوت ملیار مەتر سێجای وەک نزمترین یەدەگی مێژوویی لە عێراق تۆمارکرد. عێراق ساڵانە پێویستی بە گلدانەوەی 50 ملیار مەتر سێجا ئاو هەیە، چونکە ئاو لە عێراق 80% بۆ کشتوکاڵکردن بەکاردێت. 

 

ئەمەش بزانە: لەدوای ساڵی 2022 بیابان زیاتر لە 35% ڕووبەری ئاوی عێراق پێکدەهێنێت، وەزارەتی سەرچاوەکانی ئاوی عێراق لە ڕاگەیێراوێکدا ئاماژەی بەوەدا: دابەزینی ئاستی ئاو لە پارێزگاکانی باشوور لەم چەند رۆژەی ڕابردوودا بەهۆی بەرنەدانەوەی ئاوەوە لە تورکیاوە بۆ بەنداوی مووسڵ، کاریگەری لەسەر کۆگاکردنی ئاو لە سەرتاسەری وڵاتدا هەیە.