خامنەیی: هەڵبژاردن وەڵامێک بوو بۆ ئەو هەوڵانەی دەیانویست بایکۆت بکرێت

ئاڤا نیوز

عەلی خامنەیی، ڕێبەری باڵای کۆماری ئیسلامی، دوای تەواوبوونی هەڵبژاردن و دەرچوونی مەسعود پزیشکیان، لە پەیامێکدا ڕایگەیاند: هەڵبژاردنێکى شەفاف بەڕێوە چوو، توانیمان لە ماوەیەکى کورت و یاساییدا سەرۆککۆمار هەڵبژێرین.

وێنە گەورەکە: هەڵبژاردنی سەرۆککۆماریی ئێران لە لایەن دەسەڵات بە گرنگ هەژمار دەکرا و ڕێگەیەک بوو بۆ 'شەرعییەت وەرگرتنەوە'، چونکە لە چەند هەڵبژاردنی ڕابردوو زۆرینەی خەڵکی ئێران و ئۆپۆزسیۆن خوازیاری بایکۆت بوون. بۆیە خامنەیی لە پەیامەکەیدا دەڵێت "ئەم هەنگاوە وەڵامێک بوو بۆ ئەو هەوڵانەی دەیانویست خەڵک هەڵبژاردن بایکۆت بکات".

 

کاریگەری و لێکەوتەکان: کێبرکێی کۆتایی هەڵبژاردن لە نێوان موحافیزەکارەکانی سەر بە ڕابەر و ڕیفۆرمخوازەکان بوو کە دواجار ڕیفۆرمخوازەکان سەرکەوتن. ڕابەری کۆماری ئیسلامیش لەم بارەوە گوتی: گرنگە کێبڕکێ بۆ دۆستایەتی بگۆڕێت و هەمووان هەوڵ بۆ خۆشگوزەرانی خەڵکی ئێران بدەن و هاوکار بن لە پێشخستنی وڵات و "پێشنیار دەکەم سەرۆکی هەڵبژێردراو، لەسەر ڕێبازی ئیبراهیم ڕەئیسی بەردەوام بێت".

 

لەلایەکی ترەوە: سەرۆککۆماری تازە هەڵبژێردراوی ئێران، لە یەکەم لێدوانی دوای بردنەوەی هەڵبژاردنەکان، ڕاگەیاند، "ئەوانیش [موحافیزەکاران] برای ئێمەن. لەسەر دەستەڵات شەڕ دەکەین، ئەگەر بۆ خودا بێت شەڕمان نییە".