سەرۆکوەزیران بارزانی نامەیەک بۆ سەرۆککۆماری نوێی ئێران دەنێرێت

ئاڤا نیوز

سەرۆکوەزیران بارزانی هیواخوازە پەیوەندییە ئابووری و سیاسی و فەرهەنگییەکانی ئێران لەگەڵ هەرێمی کوردستان و عێراق و تێکڕای ناوچەکە، بەرەوپێشچوونێکی بەرچاو بەخۆیەوە ببینێت.

چیرۆکی  سەرەکی: سەرۆکوەزیران مەسرور بارزانی بە ناوی خۆی و حکومەتی هەرێمی کوردستان نامەیەکی پیرۆزبایی ئاراستەی مەسعود پزیشکیان، سەرۆککۆماری هەڵبژێردراوی ئێران دەکات.

پەیامی فەرمی: سەرۆکوەزیران بۆ پزیشکیان ئاواتەخوازە "پلان و بەرنامەکانی کابینەکەی، گەشەسەندن و پێشکەوتنی زیاتری بۆ گەلانی ئێران لێ بکەوێتەوە". 

بابەتی ستراتیژی: بە ناوی حکومەتی هەرێمی کوردستانیشەوە دەڵێت: "هاوکار دەبین و دەخوازین لەسەر بنەمای ڕێز و دۆستایەتی دوولایەنە، باشترین پەیوەندیمان لە گەل کۆماری ئیسلامیی ئێران هەبێت و پێکەوە کار بکەین بۆ ئاشتی و سەقامگیریی و پیشکەوتنی زیاتر لە ناوچەکەماندا، بە تایبەت پەرە بە پەیوەندییە بازرگانی و ئابوورییەکان بدەین بۆ باشترکردنی ئاستی ژیان و گوزەرانی هاووڵاتیانمان".

زانیاریی زیاتر: هەرێمی کوردستان و ئێران پەیوەندییەکی لە مێژینەیان هەیە کە دەتوانرێت ئەم پەیوەندییە بکرێتە زەمینەیەکی لەبار لەپێناو لێکتێگەیشتنی زیاتر و نەهێشتنی هەر کۆسپ و کێشەیەک و جێگیرکردنی پەیوەندییەک کە لەئاست چاوەڕوانیی هەردوولامان بێت. سەرۆکوەزیران بارزانی لە نامەکەیدا ئاماژەی پێکردووە.