داوای دەستلەکارکێشانەوەی ماکرۆن دەکرێت

ئاڤا نیوز

 

دوای ڕاگەیاندنی ئەنجامە بەراییەکانی هەڵبژاردنی خولی دووەمی فەڕەنسا، پارتەکەی ماکڕۆن لە پلەی دووەمە و داوای دەستلەکارکێشانەوەی دەکرێت.

 

وێنە گەورەکە: بەپێی ئەنجامە بەراییەکانی خولی دووەمی هەڵبژاردنی فەرەنسا، هاوپەیمانیی چەپ لە پلەی یەکەمە، پارتەکەی ئیمانوێل ماکرۆن پلەی دووەمە و پارتی ڕاستڕەوەی توندڕەوەیش لە پلەی سێیەمە، بەبێ ئەوەی هیچ  پارتێک دەنگی زۆرینەی ڕەها لە ئەنجوومەنی نیشتمانی بەدەستبهێنێت:

- هاوپەیمانی چەپەکان: 172 بۆ 215 کورسی بەدەستهێناوە، 
- پارتەکەی ماکرۆن 150 بۆ 180 کورسی بەدەستهێناوە.
- پارتی گردبوونەوەی نیشتمانی: 115بۆ 155 کورسی بەدەستهێناوە.

 

ئەوەی ئێستا ڕوودەدات: چەپەکان کە براوەی هەڵبژاردنەکانن، داوای دەستلەکارکێشانەوەی ماکرۆن دەکەن، سەرۆکایەتیی فەڕەنساش ڕایگەیاند، ماکڕۆن چاوەڕێی دەرکەوتنی ئەنجامی تەواوی کورسییەکانی پەرلەمان دەکات، پێش ئەوەی بڕیاری پێویست بۆ داهاتوو بدات.

 

بۆچوونی لایەنی بەرامبەر: ئیمانوێل ماکرۆن، سەرۆکی فەرەنسا داوای "وریایی" لە شیکردنەوەی ئەنجامی هەڵبژاردنی یاسادانان دەکات، بۆ ئەوەی بزانرێت کێ دەتوانێت حکومەت پێکبهێنێت.