وەزیری ناوخۆ: پەکەکە سەرچاوەی کێشە ئەمنییەکانی ناوچە سنوورییەکانە

ئاڤا نیوز

وەزیری ناوخۆ ڕایدەگەیێنێ، بیانووی هاتنی تورکیا بۆ سنوورەکان هەبوونی پەکەکەیە، چونکە سەرچاوەی هەموو کێشە ئەمنییەکانی ناوچە سنوورییەکانی هەرێمی کوردستانە.

 

وێنە گەورەکە: هێرشی تورکیا لە ڕێگەی درۆن و فڕۆکەی جەنگییەوە بۆ سەر گەریلاکانی پەکەکە لە ناوچە جیاجیاکانی هەرێمی کوردستان بەردەوامە، بەتایبەت ماوەیەکە هێرشەکانی چڕکردوونەتەوە و لە سنووری پارێزگای دهۆکیش ئۆپەراسیۆنە مەیدانییەکانی فراوان کردوون.

لێدوانی فەرمی:  ڕێبەر ئەحمەد، وەزیری ناوخۆی حکومەتی هەرێمی کوردستان لە کۆنگرەیەکی ڕۆژنامەوانی ڕایگەیاند، بیانووی هاتنی تورکیا بۆ سنوورەکان هەبوونی پەکەکەیە، بۆیە دەبێ شوێنەکان چۆڵ بکەن، چونکە سەرچاوەی هەموو کێشەکانی ناوچە سنوورییەکانن.

 

زانیاریی زیاتر: رێبەر ئەحمەد گوتی: "هەبوونی پەکەکە نایاساییە، خۆشبەختانە حکومەتی عیراقیش بڕیاری دا پەکەکە حیزبێکی قەدەغەکراوە و ڕێگەپێدراو نییە، هەموومان لەو بڕوایەداین کە پەکەکە دەبێ ئەو شوێنانە جێبهێڵێت، بۆ ئەوەی چیتر خەڵکی ئەو شوێن و گوندانە ئاوارە نەبن و شوێنەکانیان چۆڵ نەکەن و تووشی ئەزیەت و کێشە نەبن".