سێ جۆر ڤایرۆس لەنێو بەشێک لە کێڵگە پەلەوەرییەكانی سلێمانی بڵاوبووەتەوە

ئاڤا نیوز

سێ جۆر ڤایرۆسی کوشندە لەناو بەشێک لە كێڵگە پەلەوەرییەكانی سلێمانی بڵاوبووەتەوە،  بەشێوەیەك لە 24 كاتژمێردا تەنیا لە یەك كێڵگە هەزار و 750 مریشک مرداربوونەتەوە.

وێنە گەورەكە: ساڵانە لە وەرزی هاویندا ڤایرۆسی جۆراجۆر بڵاو دەبنەوە، ‎ڤایرۆسەکان لە جۆری (ئای بی، نیوكاسڵ و گەمبۆرۆ)ن، کە ڤایرۆسی کوشندەن بۆ پەلەوەرەكان.  

 
لێدوانی فەرمی: نازم عەبدوڵا، سەرۆكی كۆمەڵەی كێڵگە پەلەوەرییەكان لە پارێزگای سلێمانی بە ئاڤا نیوزی گوت: بڵاوبوونەوەی ڤایرۆس لە كێڵگە پەلەوەرییەكان، زیانێكی زۆری گەیاندووە و تەنیا لە 24 كاتژمێردا هەزار و 750  مریشک لە یەك كێڵگەدا مرادربوونەتەوە و زیانەکانی زیاتریش دەبێت، چونکە ئەو ڤایرۆسە تا هەفتەیەک زیاتر تەشەنە دەکات".

ئەوەی پێویستە بیزانیت: لە  كێڵگە پەلەوەرییەكاندا پێویستە ڕێژەی شێ كەم بێت و پلەكانی گەرما نزم، ئەگەر نا لە كاتی بڵاوبوونەوەی هەر جۆرە ڤایرۆسێك لە وەرزی هاویندا بە خێرایی تەشەنە دەکات و زیانێکی زۆری دەبێت.

قووڵتر: ڤایرۆسی ئای بی و نیوکاسڵ، تووشی کۆئەندامی هەناسە دەبن، کاریگەرییان لەسەر هەرس و دەمارەکانیش دەبێت، گەمبۆرۆ کاریگەری لەسەر بەرگری جەستە دەبێت و پەلەوەرەکان لاواز دەکات.