پێکهاتەکان داوای زیادکردنی ژمارەی کورسییەکانیان لە پەرلەمان دەکەن

ئاڤا نیوز 

 

وەزیری هەرێم بۆ کاروباری پێکهاتەکان ئاماژە بەوە دەدات، لەسەر ژمارەی کورسی و شێوازی دابەشکردنی بەسەر پارێزگاکاندا ناڕاین و داوای زیادکردنیان دەکەن.

 

وێنە گەورەکە: بەشێک لە لایەنە سیاسییەکان لە پێکهاتە و نەتەوەکانی تورکمان، کلدان، سریان و ئاشوور لەگەڵ وەزیری هەرێم بۆ کاروباری پێکهاتەکان کۆبوونەوە، گفتوگۆ لەسەر زیادکردنی شەش کورسی دیکە کرا.

 

لێدوانی فەرمی: ئایدن مەعرووف، وەزیری هەرێم بۆ کاروباری پێکهاتەکان ڕاگەیاند: "دابەشکردنی کورسی بەسەر پارێزگاکاندا لەسەر بنەمای سیاسییە و دەبێت لەسەر بنەمایەکی جوگرافی و بە سیستەمی یەک بازنەیی بێت."

 

ئەوەی پێویستە بیزانیت: دادگەی فیدراڵی بەبڕیارێک کورسیی کۆتای پێکهاتەکانی هەڵوەشاندووەتەوە، لە کۆی 100 کورسیی پەرلەمانی هەرێمی کوردستان پێنجیان بۆ پێکهاتەکان تەرخان دەکرێت.

 

دابەشکردنەکە بەمشێوەیە: بەپێی بڕیاری ئەنجوومەنی کۆمسیارانی کۆمسیۆنی باڵای هەڵبژاردنەکان کورسیی پێکهاتەکان بەمشێوەیە بەسەر پارێزگاکاندا دابەش کراوە:

- کورسییەکی مەسیحی و کورسیەکی تورکمان بۆ هەولێر 
- کورسیەکی مەسیحی و کورسیەکی تورکمان بۆ سلێمانی 
- یەک کورسی ئەرمەنییەکان بۆ دهۆک.