لە سەرەتای ئەمساڵەوە نزیکەی سێ ملیۆن گەشتیار هاتوونەتە هەرێمی کوردستان

ئاڤا نیوز

 

بەگوێرەی ئاماری دەستەی گەشتوگوزاری هەرێمی کوردستان، لە سەرەتای ئەمساڵەوە نزیکەی سێ ملیۆن گەشتیار و سەردانیکار هاتوونەتە هەرێمی کوردستان کە بەشێکی زۆریان لە پارێزگاکانی ناوەڕاست و خوارووی عێراقەوە هاتوون.

 

وێنە گەورەکە: لە ماوەی شەش مانگی ساڵی ڕابردوو چوار ملیۆن و 500 هەزار گەشتیار و سەردانیکار لە هەرێمی کوردستان تۆمار کران، ئەمساڵ لە چوار مانگی سەرەتای ساڵ زیاتر لە دوو ملیۆن گەشتیار هاتوونەتە هەرێمی کوردستان.

 

لێدوانی فەرمی: ئەمەل جەلال، سەرۆکی دەستەی گەشتوگوزاری هەرێمی کوردستان ڕایگەیاند: هەوڵی زیاتر دەدەین کە کەشێکی ئارام بۆ گەشتیاران بڕەخسێنین و دەمانەوێ بە سەلامەتی بێن و ڕووبەڕووی هیچ ئاستەنگییەک نەبنەوە. 

 

ژمارەکان وادەڵێن: ئیبراهیم عەبدولمەجید، گوتەبێژی دەستەی گەشتوگوزاری هەرێمی کوردستان بە ئاڤا نیوزی گوت، لە ماوەی چوار مانگی سەرەتای ئەمساڵ دوو ملیۆن گەشتیار و سەردانیکار تۆمارکراون، هەروەها لە پشووی ڕۆژانی جەژنی قوربان لە ماوەی هەشت ڕۆژ 348 هەزار کەس بە مەبەستی حەوانە لە ناوچە گەشتیارییەکان هاتوونەتە هەرێمی کوردستان."