بەغدا و واشنتن لەبارەی بەهای دۆلار کۆبوونەوە

ئاڤا نیوز 

وەزیری دەرەوەی عێراق بە یاوەری شاندێک لەگەڵ نوێنەرانی وەزارەتی گەنجینەی ئەمریکا، لەبارەی بەهای دینار بەرامبەر بە بەهای دۆلار لە واشنتن کۆبوونەوە.

وێنە گەورەکە: دوێنێ فوئاد حوسێن، وەزیری دەرەوەی عێراق بە سەرۆکایەتی شاندێک لەگەڵ براین نێلسۆن، بریکاری وەزارەتی گەنجینەی ئەمریکا بۆ کاروباری تیرۆر و سپیکردنەوەی پارە، لەبارەی پرسی ئابووری و سیستەمی بانکیی لە عێراق و کەرتی وزە کۆبووەوە.

ڕاگەیێنراوی فەرمی: وەزارەتی دەرەوەی عێراق ڕایگەیاند: "وەزیری دەرەوەی عێراق داوای لە لایەنی ئەمریکی کردووە پێداچوونەوە بە بڕیاری سزادانی 32 بانکی عێراقی بکەن چونکە چاکسازی هەیکەلی کراوە لەو بارەیەوە".

زانیاریی زیاتر: "فوئاد حوسێن ئاماژەی بەوە کردووە جێگیربوونی بەهای دینار بەرامبەر بە دۆلاری ئەمریکی فاکتەرێکی سەرەکیی سەقامگیریی ئابووری، کۆمەڵایەتی و سیاسییە لە عێراق و داوای لە دامەزراوە پەیوەندیدارەکانی ئەمریکا کرد بە بڕیارەکانیاندا بچنەوە".

لە لایەکی دیکەوە: براین نێلسۆن، ئامادەیی وڵاتەكەی بۆ هاوکاریکردنی عێراق دەربڕی بۆ چارەسەرکردنی ئاڵنگاری و گرفتە ئابووری و داراییەکان.