گەرمبوونی زەوی پێوانەیەكی نوێ تۆمار دەكات

ئاڤا دیجیتاڵ

بە گوێرەی نوێترین ڕاپۆرتی دامەزراوەی کۆپەرنیکی یەکێتیی ئەوروپا بۆ گۆڕانە ژینگەییەکان، بۆ یەکەمجار پلەی گەرمای گۆی زەوی لە ماوەی یەک ساڵدا لە یەک و نیو پلەی سەدی زیاتر بووە. 

وێنە گەورەکە: شارەزایان خێرایی گەرمبوونی زەوی بە مەترسییەکی گەورە لە سەر ژیان لە سەر هەسارەی زەوی دەزانن، هۆکاری سەرەکیی گەرمبوونی زەوی و گۆڕانی ئاوهەواش چالاکییەکانی مرۆڤە لە سەر گۆی زەوی لەوەتەی شۆڕشی پیشەسازیی سەریهەڵداوە بە شێوەیەکی بەرچاو زیادیان کردووە. 

زانیاریی زیاتر: بە گوێرەی داتاکانی کۆپەرنیک، کە لە نێوان شوباتی 2023 تا کانوونی دووەمی 2024 کۆکراونەتەوە، پلەی گەرمای زەوی لەو ماوەیەدا 1.52 پلەی سەدی گەرمتر بووە. ئەمەش پێوانەیەکی نوێیە لەوەتەی شۆڕشی پیشەسازی دەستی پێکردووە.

جگە لەمە، کانوونی دووەمی ئەمساڵ بە گەرمترین مانگی کانوونی دووەم دادەنرێت لەوەتەی پلەکانی گەرما دەپێورێن.

لەلایەکی دیکەوە: ناسا گەرمبوونی زەوی لە ماوەی 12 مانگی رابردوودا بە کەمێک کەمتر لە 1.5 پلەی سەدی پێوانە کردووە. هاوکات، دامەزراوەی بێرکلی ئێرز رایگەیاندووە بەرزبوونەوەی پلەی گەرمیی زەوی لە  1.5 زیاترە. هۆکاری بوونی ئەم جیاوازییە بچووکانە بۆ جیاوازیی دامەزراوەکان لە خەمڵاندنەکانیان بۆ پلەی گەرمیی زەوی لەو کاتەی کە پێوانەکردن نەبووە دەگەڕێتەوە. لەگەڵ ئەوەشدا هەموویان کۆکن لە سەر ئەوەی کە زەوی لە خولێکی نوێی گەرمبووندایە کە ماوەیەکی دوورودرێژ دەخایەنێت.

زانیاری زیاتر: گەرمبوونی زەوی و گۆڕانی ئاوهەوا بە یەکێک لە کێشە جیهانییە هاوچەرخەکان دادەنرێت. ساڵی 2015 رێککەوتننامەی نێودەوڵەتیی پاریس بۆ رووبەڕووبوونەوەی ئەم دیاردەیە بەسترا. تا ئێستا 195 دەوڵەت پەیماننامەکەیان واژۆ کردووە.