بەرپرسی لقی پارتی لە کەلار وردەکاریی تەقینەوەی ئۆتۆمبێلەکەی ئاشکرا دەکات

ئاڤا نیوز

بەرپرسی لقی پارتی لە کەلار وردەکاریی ڕووداوی بەردەم ماڵەکەی ئاشكرا دەکات و دەڵێت "تیرۆریستی بووە و ئۆتۆمبێلەکەی  تەقێنراوەتەوە".

 چیرۆکی سەرەکی: کاتژمێر 9:15 خولەکی ئەمڕۆ بەیانی ئەکرەم ساڵح، بەرپرسی لقی 22ی پارتی دیموکراتی کوردستان لە کەلار، لە کاتی چوونەدەرەوە لە ماڵ ئۆتۆمبێلەکەی تەقییەوە  و خۆی و شۆفێرەکەی و پاسەوانێکی بەسووکی برینندار بوون.

لێدوانی فەرمی: ئەکرەم ساڵح لە کۆنگرەیەکی ڕۆژنامەوانیدا ڕایگەیاند: دوای 15 بۆ 20 خولەک لە هێنانەدەرەوەی ئۆتۆمبێلەکەم لە حەوشەی ماڵەکەمەوە لەلایەن شۆفێرەکەمەوە، کاتێک بۆ ناو ئۆتۆمبێلکە سەرکەوتووم ئینجا تەقییەوە، بۆیە گومانم هەیە لەڕێگەی کۆنترۆڵەوە تەقێنرابێتەوە".

زانیاریی زیاتر: لە کاتی ڕووداوەکەدا ئەکرەم ساڵح خۆی و شۆفێرەکەی و پاسەوانێکی لەنێو  ئۆتۆمبێلەکە بوون و هەرسێکیان بەسووکی بریندار بوون. زیاتر گوتیشی: "پێموایە ڕووداوەکە تیرۆریستییە، ئەو شوێنەی من لێی دادەنیشم بۆمبەکە لەژێر ئەو تایەی دانرابووەوە، ئەگەر خولەکێک  درەنگتر لە ئۆتۆمبێلەکە دابەزیباین کارەساتمان بەسەردا دەهات و هەموومان دەسووتاین".

لەلایەکی دیکەوە: بەرپرسی لقی پارتی لە کەلار گوتی: "بەدڵنیاییەوە ڕووداوەکە دەستی لەپشتە و بە خەڵکی ناشارەزا ناکرێت، ئەمەش ئاماژەیە بۆ ئەوەی لایەنێک یان گرووپێک لەپشت بابەتەکەن، بەڵام ناتوانین هیچ کەس و لایەنێک تۆمەتبار بکەین و چاوەڕوانی لێکۆڵینەوەکانین".

گۆشەیەکی دیکە: ئەکرەم ساڵح باسی لەوە کرد لە "کامێرای ماڵەکەی کردەوەکە بە پوختی و ڕوونی دیارە چۆنە، لایەنی ئەمنی دەتوانن سوود لە کامێراکانی ئێمە و سنوورەکە وەربگرن بۆ ئاشکراکردنی بکەرەکان".