زانیاریی ورد و چیرۆکی تەقاندنەوەی ئۆتۆمبێلی بەرپرسی لقی پارتی لە کەلار

ئاڤا نیوز

 

بکەری تەقاندنەوەی ئۆتۆمبێلی ئەکرەم ساڵح، بەرپرسی لقی 22ی پارتی دیموکراتی کوردستان لە گەرمیان گەنجێکی خەڵکی کەلارە و شەو بۆمبەکەی خستووەتە ژێر ئۆتۆمبێلەکە.

 

چیرۆکی سەرەکی: نزیکەی کاتژمێر 11:00ی شەوی یەکشەممە 14-7-2024، لەکاتێکدا یاری کۆتایی پاڵەوانێتیی یۆرۆ هەبوو لە نێوان هەردوو هەڵبژاردەی ئیسپانیا و ئینگلتەرا، کەسێک بۆمبێکی لکێنراو دەخاتە ژێر ئۆتۆمبێلی ئەکرەم ساڵح لەبەردەم ماڵەکەیدا لە گەڕەکی شەهیدانی کەلار.

 

زانیاریی تایبەت: لە کامێراکانی چاودێریی ماڵی ئەکرەم ساڵح و دراوسێکانی دەرکەوتووە؛ کەسەکە گەنج بووە، جلوبەرگی کوردی لەبەربووە، بە ملپێچێکی ڕەنگاوڕەنگی هاوشێوەی ملپێچی گەریلاکانی پەکەکە ڕووخساری داپۆشیوە.

 

زانیاریی زیاتر: کەسەکە کاتێک بۆمبەکە دەخاتە ژێر ئۆتۆمبێلەکە خۆی دەچەمێنێتەوە، لە کاتی هەستانەوە دەمامکی لەسەر ڕووخساری لادەچێت و لەم ڕێگەیەوە دەناسرێتەوە.

 

شێوازی جێبەجێکردن: گەنجەکە سەرقاڵبوونی پاسەوانەکانی بە سەیرکردنی یاری بە دەرفەت زانیوە،  هەمان شەو دوای یارییەکە، پاسەوانەکان ئۆتۆمبێلەکە دەبەنە حەوشە، بەیانیش کاتژمێر 9:00 دەیهێننەوە دەرەوە، کاتژمێر 9:23 خولەک کاتێک ئەکرەم ساڵح دەیەوێت لە ماڵ دەربچێت و لەگەڵ شۆفێرەکەی و پاسەوانێکی سەر ئۆتۆمبێل دەکەون، بۆمبەکە بە کۆنترۆڵ لە دوورەوە دەتەقێنرێتەوە.

 

ئەنجامی لێکۆڵینەوە: لە لێکۆڵینەوەکاندا دەرکەوتووە گەنجەکە خەڵکی قەزای کەلارە و خۆی و خانەوادەکەی ناسراونەتەوە، تاوەکو ئێستاش نەتوانراوە دەستگیر بکرێت.

 

ئەوەی لەبارەیەوە دەگوترێت: ئەنجوومەنی ئاسایشی هەرێمی کوردستان ئێوارەی ئەمڕۆ لە ڕاگەیێنراوێکدا کردەوەکەی بە “تیرۆریستی” ناساند و ڕایگەیاند “پەکەکەی لەپشتە”.

 

لێدوانی فەرمی: کەسێکی ئاگادار لە ئەنجامی لێکۆڵینەوەکە بە ئاڤا نیوزی گوت: "تۆمەتبارکردنی پەکەکە تەنیا بەهۆی ئەوە نەبووە گەنجەکە ملپێچێکی هاوشێوەی ئەوانی لە مل بووە، بەڵکو خۆی و خانەوادەکەی ناسراونەتەوە و دڵنیایین لە پەکەکە نزیکن و پەیوەندییان بەو حیزبەوە هەیە".

 

باکگراوند: کاتژمێر 9:23 خولەکی ڕۆژی دووشەممە 15-7-2024 ئۆتۆمبێلی ئەکرەم ساڵح لە جۆری لاندکروزەر لە بەردەم ماڵەکەیدا تەقییەوە، بەهۆیەوە خۆی و شۆفێرەکەی و پاسەوانێکی زۆر بەسووکی بریندار بوون، دوو کاتژمێر دواتر لە کۆنگرەیەکی ڕۆژنامەوانیدا ڕایگەیاند هەوڵەکە تیرۆریستی بووە.