بایدن: وەڵامدانەوەی سەربازیی ئیسرائیل لە غەززە سنوورەكانی تێپەڕاندووە

ئاڤا دیجیتاڵ

جۆ بایدن، سەرۆكی ئەمریكا ڕایگەیاند، وەڵامدانەوەی سەربازیی ئیسرائیل لە غەززە سنووری تێپەڕاندووە و گوشار دەكەین بۆ گەیشتن بە ئاگربەستی درێژخایەن لە غەززە.

لێدوانی فەرمی: جۆ بایدن، سەرۆكی ئەمریكا لە كۆنگرەیەكی ڕۆژنامەوانیدا لە كۆشكی سپی ڕایگەیاند: وەڵامدانەوەی سەربازیی ئیسرائیل لە كەرتی غەززە دوای ئەو هێرشەی حەماس كردییە سەر ئیسرائیل زێدەڕۆیی تێداكراوە.

"بە تووندی گوشار دەكەین لەپێناو گەیشتن بە ئاگربەستێكی درێژخایەن لە غەززە و لە سەرەتای شەڕەكەوە هەوڵمانداوە كاریگەری لەسەر هاووڵاتیانی سڤیل كەم بكەینەوە، لەسەرەتادا عەبدولفەتاح سیسی سەرۆكی میسر ڕێگەی نەدەدا دەروازەی ڕەفەح بكرێتەوە تا هاوكارییە مرۆییەكان بگاتە غەززە".

ئەوەی پێویستە بیزانیت: پێشتر بەرپرسانی ئەمریكا ڕەخنەی ئەوەیان گرتووە كە وەڵامدانەوەی ئیسرائیل بۆ هێرشەكەی حەماس كاریگەریی زۆری لەسەر هاووڵاتیانی سڤیلی غەززە هەبووە.

باكگراوند: لەحەوتی ئۆكتۆبەری ساڵی ڕابردوو حەماس هێرشێكی لەناكاوی كردە سەر ئیسرائیل و زیاتر لە هەزار و 140 كەسی كوشت، دواتریش ئیسرائیل هێرشی بەرفراوانی كردە سەر كەرتی غەززە و تائێستا بەگوێرەی ئامارەكانی تەندروستی غەززە نزیكەی 28 هەزار كەس كوژراون كە زۆرترینیان سڤیلن.