سیناریۆکانی گەڕانەوەی سەدر بۆ ناو سیاسەت

ئاڤا نیوز

لە ساڵی 2022 ەوە کە موقتەدا سەدر ڕێگەی پێنەدرا حکومەت پێکبهێنێت، لە پرۆسەی سیاسی کشایەوە، ئێستاش باسی چەند سیناریۆیەک دەکرێت بۆ گەڕانەوەی.

چیرۆکی سەرەکی: عەقیل عەباس، شرۆڤەکاری سیاسی سەبارەت بە گەڕانەوەی موقتەدا سەدر بۆ ناو گۆڕەپانی سیاسی لە گفتوگۆیەکدا لەگەڵ ئاڤا نیوز پێیوایە، موقتەدا سەدر ڕێبەری ڕەوتی نیشتمانی شیعی بە لێکتێگەیشتن لەگەڵ چوارچێوەی هەماهەنگی ناگەڕێتەوە ناو پرۆسەی سیاسی، ئەگەر بەو شێوەیە بگەڕێتەوە گورزێکی گەورەی بەردەکەوێت لەبەرامبەر لایەنگرانیدا.

 ئەوەی پێشبینی دەکرێت: عەقیل عەباس لەو باوەڕەدایە سەدر یا لەڕێگەی بەشداریکردن لە هەڵبژاردنی پەرلەمان دەگەڕێتەوە یان خۆپێشاندانی لایەنێکی دیکە، ئەویش بە بەهێزی بەشداری تێدا دەکات.

لەلایەکی دیکەوە: فەتاح شێخ، شرۆڤەکاری سیاسی بە ئاڤا نیوزی گوت،  نەخشەی هاوپەیمانێتییە سیاسییەکان لە داهاتوودا گۆڕانکاری زۆریان تێدا دەکرێت، چوارچێوەی هەماهەنگی وەکو ئێستا یەکگرتوو و یەک دەنگ نامێنێتەوە و هەر لایەنە و بە جیا بەشداری هەڵبژاردن دەکات.

گۆشەیەکی دیکە: ئامانج لە جموجوڵەکانی ئەم دواییەی موقتەدا سەدر کۆنترۆڵکردن و کاریگەری دروستکردنە لەسەر جەماوەری شیعی، بۆنموونە یەکێک لەو هەنگاوانەی بەم دواییانە  مشتومڕی دروست کرد، گۆڕینی ناوی هاووڵاتییەکی سوننە بوو لە  یەزیدەوە بۆ عومەر.