سەرۆککۆماری عێراق: شەڕی گرووپە چەکدارەکان دژی ئەمریکا خزمەت بە غەززە ناکات

ئاڤا نیوز

 

سەرۆککۆماری عێراق لە کۆبوونەوەیەکدا بە سەرکردەکانی هاوپەیمانیی ئیدارەی دەوڵەتی ڕاگەیاندووە، شەڕی گرووپە چەکدارەکان دژی ئەمریکا هیچی بۆ فەڵەستین دابین نەکردووە. 

 

وێنە گەورەکە: لە ڕۆژی 04ـی ئەم مانگە، هاوپەیمانیی ئیدارەی دەوڵەت کۆبووەتەوە، لە کۆبوونەوەکەدا لەتیف ڕەشید، سەرۆککۆماری عێراق یاداشتێكی ئاراستەی سەرکردە سیاسییەکان لەنێویاندا سەرکردەکانی چوارچێوەی هەماهەنگی کردووە، بۆ ئەوەی بڕیاری یەکلاکەرەوە سەبارەت بە پەیوەندییە ئەمنییەکانی نێوان ئەمریکا و عێراق بدەن؛ هەموو سەرکردەکانی ئیدارەی دەوڵەت پشتگیرییان لە پاراستنی پەیوەندیێكی باش لەگەڵ واشنتۆن کردووە. 

 

لێدوانی فەرمی: بەپێی ڕاپۆرتێک کە ڕۆژنامەی شەرقولئەوسەت بڵاویکردووەتەوە، سەرۆککۆماری عێراق لە کۆبوونەوەکەدا گوتەیەکی پێشکەشی ئامادەبووان کردووە و گوتوویەتی "هێرش و جموجوڵی گرووپە چەکدارەکان دژی ئەمریکا، هیچی بۆ گەلی فەڵەستین دابین نەکرد، هەروەها کاریگەری لەسەر ئاراستەی ڕووداوەکانی غەززە نەبووە".

 

زانیاریی زیاتر: سەرۆکوەزیرانی عێراقیش هاوڕای سەرۆککۆمار بووە، بەڵام "لەژێر فشاری بەشێک لە سەرکردەکانی چوارچێوەی هەماهەنگیدایە، کە ئەمەش ڕێگر دەبێت لەبەردەم ڕاگەیاندنی هەڵوێستێکی ئارام کە پەیوەندیێكی باش لەگەڵ ئەمریکا بپارێزێت".