شاندێکی هەرێمی کوردستان بۆ چارەسەری کێشەی بەرهەمە ناوخۆییەکان  لە بەغدان

ئاڤا نیوز

شاندێکی هاوبەش لەنێوان وەزارەتی بازرگانی و پیشەسازی پێکهێنراوە و لە بەغدان بۆ چارەسەری کێشەی هاوردەکردنی بەرهەمەکانی هەرێمی کوردستان، بۆ ئەوەی ڕێگریکردن لە هاوردەکردنی بەرهەمەکانی کۆمپانیا و کارگەکانی هەرێمی کوردستان بوەستێنرێت.

وێنە گەورەکە: بەبڕیاری دیوانی ئەنجوومەنی وەزیران سەرجەم کاڵا و شمەکی بەرهەمە ناوخۆییەکان دەبێت مۆڵەتی حکومەتی عێراقیان هەبێت، دواتر ڕێگەی تێپەربوونیان بۆ پارێزگاکانی ناوەڕاست و خوارووی عێراق لە دەروازەکان پێدەدرێت.

لێدوانی فەرمی: گەیلان حاجی سەعید، سەرۆکی ژووری بازرگانی هەولێر، بە ئاڤا نیوزی گوت: "نووسراومان کردووە بۆ یەکێتیی ژوورەکانی عێراق و وەزارەتی پیشەسازی بۆ چارەسەری ئەم کێشەیە و  ئەم بڕیارەی دراوە پێچەوانەی ماددەی 24 ی دەستووری عێراقە".

بۆچی گرنگە: %70ی ئەو بەرهەمانەی هاوردەی هەرێمی کوردستان دەکرێن، لەگەڵ ئەو بەرهەمە جۆراوجۆرانەی لە کۆمپانیا و کارگەکانی هەرێمی کوردستان بەرهەم دەهێنرێت، لە بازاڕی پارێزگاکانی عێراق ساغدەکرێنەوە.