لە ئۆپەراسیۆنێکی نهێنیدا دوو بارمتەی ئیسرائیلی ڕزگارکران

ئاڤا دیجیتاڵ 

لە ئۆپەراسیۆنێکی نهێنیدا، هێزێكی تایبەتی سوپای ئیسرائیل هەڵیانكوتایە سەر باڵەخانەیەک لە ناوەڕاستی ڕەفەح و دوو بارمتەیان ڕزگاركرد و گەڕێنرانەوە ئیسرائیل.

چیرۆكی سەرەكی: كاتژمێر 1:49 خولەکی بەرەبەیانی ئەمڕۆ دووشەممە بە كاتی تێلئەڤیڤ، هێزی تایبەتی ڕاهێنراوی ئازادكردنی بارمتە لە سوپای ئیسرائیل، بە فەرمانی ڕاستەوخۆی بنیامین نەتانیاهۆ و بەچاودێریی یۆئاڤ گالانت، وەزیری بەرگری, بەنهێنی دەچنە باڵەخانەیەک لە ناوەڕاستی ناوچەی ڕەفەح لە کەرتی غەززە.

دوو بارمتەی ئیسرائیلی (تەمەن 60 ساڵ و 70 ساڵ) لە نهۆمی دووەمی باڵەخانەكەدا حەشار درابوون، ئەو باڵەخانەیە و باڵەخانەكانی تەنیشتی بە چەكدارانی حەماس دەورەدرابوون، هێزە تایبەتەكە هەردوو بارمتەکە دەگوازنەوە بۆ ئیسرائیل .

ئەوەی پێویستە بیزانیت: لەو ساتەی لەلایەن یەکەیەکی نهێنی هێرش کراوەتە سەر شووقەکە، شەڕێکی تووند ڕوویداوە و تەقەی زۆر كراوە. بەپێی قسەی گوتەبێژی سوپای ئیسرائیل "هیچ سەربازێكیان بریندار نەبووە و دەیان چەكداریش كوژراون."

باکگراوند: ماوەی 129 ڕۆژە ئیسرائیل و گرووپە چەكدارەكان لە شەڕێكی تووندان، تا ڕۆژی یەکشەممە 28 هەزار و 178 کەس كوژراون، 67 هەزار و 784 كەسیش بریندار بوونە.