لە نەینەوا حەشدی شەعبی دەخرێتە ئامادەباشییەوە

ئاڤا نیوز

 

فەرماندەیەکی گرووپە چەکدارەکانی عێراق، پەیامێکی ئاراستەی چەکدارەکانی سنووری نەینەوای کردووە، داوایان لێدەکات لە ئامادەباشی دابن "چونکە دۆخی ئەو ناوچەیە لە مەترسیدایە".

وێنە گەورەكە: ئەمڕۆ لە نێوان هێزەکانی هەسەدە و بەشار ئەسەد و چەند هۆزێکی عەرەبی شەڕ دروستبووە، پێشبینی گەیشتنی مەترسییەکە بۆ سنوورەکانی عێراقیش دەکرێت.

پەیامی فەرمی: حەمید یاسری، فەرماندەی هێزی ئەنساری مەرجەعیەی حەشدی شەعبی سەر بە حەوزەی نەجەف، لە پەیامێکدا داوای لە چەکدارەکانی لیواکەی کردووە دەستبەجێ بچنە ناو فیرقەکانیانەوە و لە ئامادەباشیدابن.

زانیاریی زیاتر: ئەو فەرماندەیە بە چەکدارەکانی گوتووە، " دوای گەیشتنی ئەم بانگەوازە بە ئێوە، هەموو شتێک بەجێبهێڵن و بچن لە جەزیرەی نەینەوا بڵاوببنەوە، چونکە جەزیرەکە لە مەترسیدایە".

ئەوەی پێویستە بیزانیت: لە ماوەی ڕابردوودا ژمارەیەکی زۆر لە زیندانییەکانی ژێر دەسەڵاتی هەسەدە ئازادکراون کە بە یاسای تیرۆر دەستگیرکرابوون.