سەرۆکوەزیران بارزانی داواکارییەکانی سلێمانی و هەڵەبجە جێبەجێ دەکات

ئاڤا نیوز

 

سەرۆکوەزیرانی هەرێمی کوردستان ڕەزامەندی لەسەر جێبەجێکردنی داواکارییە ئیدارییەکانی پارێزگاکانی سلێمانی و هەڵەبجە و ئیدارەکانی ڕاپەڕين و گەرمیان دەدات. 

 

وێنە گەورەكە: ڕۆژی 30ی حوزەیرانی ئەمساڵ، سەرۆكوەزیران بارزانی سەردانی هەردوو پارێزگای سلێمانی و هەڵەبجەی كرد، بەڕێوەبەر و بەرپرسانی كارگێڕی ئەو دوو پارێزگایە و ئیدارە سەربەخۆكانی ڕاپەڕین و گەرمیان كۆمەڵێك داواكارییان خستە بەردەم سەرۆكی حكومەتی هەرێمی كوردستان، ئەمڕۆ ڕەزامەندی لەسەر داواكارییەكانیان درا.

ڕاگەیێنراوی فەرمی: ئەنجومەنی وەزیرانی حكومەتی هەرێمی كوردستان ئەمڕۆ پێنجشەممە ڕایگەیاند: بۆ پارێزگای سلێمانی بڕیاردرا، دەسەڵات بدرێتە فەرمانگەكان بە گواستنەوەی فەرمانبەران بەشێوەی گواستنەوەی ڕاژە یان تەنسیب بۆماوەی دوو ساڵ، بەڵام وەزارەتەكانی ناوخۆ و پەروەردە و خوێندنی باڵا ناگرێتەوە، هاوكات بڕیاردرا بە دامەزراندنی 177 فەرمانبەر بەشێوەی گرێبەست.

چی بۆ پارێزگای سلێمانی بڕیاری لێدراوە؟
بۆ پارێزگای سلێمانی سەرۆكوەزیران بارزانی ڕەزامەندی داوە بە  پێدانی دەسەڵات بە تەرخانكردنی ڕێژەی %30 لە داهاتی پارێزگای سلێمانی بۆ جێبەجێكردنی پڕۆژە خزمەتگوزارییەكان و دەسەڵات بە پارێزگاری سلێمانی درا بۆ خەرجكردنی پارەكە.
-   ماوەی 30 ڕۆژ دەسەڵاتی ئیفاد دراوە بە پارێزگاری سلێمانی بۆ فەرمانبەران ئەوانەی پلەیان لەخوار بەڕێوەبەری گشتییە.
-  بڕیاردراوە ئەگەر تەندەرێك تا یەك ملیار دینار بوو، دەسەڵاتی گرێبەستی بدرێت بە پارێزگاری سلێمانی.
-  پێشینەكانی پارێزگای سلێمانی زیادكراوە بۆ 319 ملیۆن دینار.
-  پێشینەی سەرۆكایەتی شارەوانی سلێمانی زیادكراوە بۆ 350 ملیۆن دینار.
-  بۆ فڕۆكەخانەی نێودەوڵەتیی سلێمانی زیاتر لە 522 ملیۆن دینار دابینكراوە بۆ ئەنجامدانی ڕووپێوی فڕۆكەوانی كە لە لایەن كۆمپانیای (CGX) فەڕەنسی دابین دەكرێت.
-  ڕەزامەندی دراوە لەسەر خەرجكردنی زیاتر 68 هەزار دۆلار بۆ كڕینی ئامێری جۆری (X-RAY).
-  بۆ ئاگر كوژێنەوەی فڕۆكەخانەی نێودەوڵەتی سلێمانی شەش ملیۆن دۆلار بۆ كڕینی ئۆتۆمبێل و ئامێر تەرخانكراوە. هاوكات 23 ئۆتۆمبێلی خزمەتگوزاریش دابینكراوە.
-  ڕەزامەندی درا لەسەر چارەسەركردنی خانووە زێدەڕۆكان و ئەوانەی تا 9-9-2022 مامەڵەكانیان وەرگیراوە.
-  پێنج ملیار و 13 ملیۆن و 400 هەزار دینار بۆ جێبەجێكردنی پڕۆژە خزمەتگوزاریەكانی پارێزگای سلێمانی تەرخانكراوە.
-  دابینكردنی 15 ئۆتۆمبێل بۆ بەڕێوەبەرایەتی ناحیەكانی سنووری پارێزگای سلێمانی هاوكات 14 ئامێری ( حادیلە – گەلابە- كاسحەی بەفر – شۆفل- قاشتە) بۆ شارەوانی سلێمانی تەرخاندەكرێت.

بۆ  پارێزگای هەڵەبجە ئەم بڕیارانە دراون:
-  بڕیاردرا ڕێژەی %20ی داهاتی دەروازە سنوورییەكانی پارێزگای هەڵەبجە بۆ پڕۆژە خزمەتگوزراییەكان خەرجبكرێت.
-  ڕەزامەندی درا لەسەر زیادكردنی پێشینەكانی دیوانی پارێزگا و قایمقامیەتەكان و ناحیەكانی سنووری پارێزگای هەڵەبجە لە 56 ملیۆن دینار بۆ 134) ملیۆن دینار .
-  دەروازەی سازان بە فەرمی دەكرێت.
-  بەڕێوەبەرایەتی گومرگی هەڵەبجە لە سنووری پارێزگای هەڵەبجە دەكرێتەوە.
-  52 فەرمانبەر بەشێوەی گرێبەست دادەمەزرێن.
-  23 ئۆتۆمبێل بۆ دیوانی پارێزگای هەڵەبجە دەكڕدرێن.

بۆ ئیدارە سەربەخۆكان ئەم بڕیارانە دراون:
-  خەرجی كتوپڕی پێشینەكانی ئیدارەی سەربەخۆی ڕاپەڕین بۆ 99 ملیۆن دینار زیاد دەكرێت.
-  43 فەرمانبەر بەشێوەی گرێبەست دادەمەزرێن.
-  ڕەزامەندی درا لەسەر دابینكردنی 13 ئۆتۆمبێل بۆ سنووری ئیدارەی سەربەخۆی راپەڕین، قایمقامیەتی رانیە، قایمقامیەتی پشدەر، ناحیەكانی سەركەپكان و سەنگەسەر و بێتواتە و حاجیاوا.
-  بۆ ئیدارەی گەرمیان بڕیاری زیادكردنی پێشینەی خەرجی باری لەناكاو بۆ 78 ملیۆن دینار درا.
-  133 فەرمانبەر بەشێوەی گرێبەست دادەمەزرێنرێت.
-  دەسەڵات دراوە بە وەزارەتی شارەوانی كێشەی زەوی سندوقی لە ئیدارەی گەرمیان یەكلایی بكاتەوە.
-   زەوی بۆ میراتگری شەهیدان و ئەنفالكراوان و راگیراوانی سیاسی و ڕزگاربوانی شاڵاوی ئەنفالی ناوچە كوردستانیەكانی دەرەوەی ئیدارەی هەرێم دابین بكات كە ژمارەیان 274كەسە بۆ ئەوەی لە شوێنی شیاو زەوییان پێبدرێت.
-  35 ئۆتۆمبێل بۆ ئیدارەی گەرمیان تەرخاندەكرێت.
-  39 پڕۆژە گواسترانەوە بۆ سەر بودجەی وەبەرهێنانی وەزارەتە پەیوەندیدارەكان بۆ وەگەڕخستنەوەیان.