"هیچ ڕێککەوتنێک لەبارەی هەناردەکردنەوەی نەوتی کوردستان نەکراوە"

ئاڤا نیوز

وەزیری نەوتی عێراق ڕایدەگەیێنێ، لەبارەی هەناردەکردنەوەی نەوتی هەرێمی کوردستان لەگەڵ کۆمپانیا نەوتییەکان لە گفتوگۆ بەردەوامن و تائێستا هیچ ڕێککەوتنێک نەکراوە.

 

وێنە گەورەکە: ساڵێک و  چوار مانگە بە بڕیاری دادگای ناوبژیوانی پاریس هەناردەکردنی نەوتی هەرێمی کوردستان ڕاگیراوە، سەرەڕای پابەندییەکانی هەولێر بە ڕێککەوتنەکان لەگەڵ بەغدا، بەڵام تاوەکو ئێستا کێشەکە چارەسەر نەکراوە.

 

ئەوەی پێویستە بیزانیت: دوێنێ  سێشەممە سەرۆکوەزیرانی عێراق لەگەڵ وەزیرانی دارایی و نەوت و پلاندانان، پارێزگاری بانکی ناوەندی و لیژنەی دارایی پەرلەمان کۆبووەوە و گفتوگۆ لەبارەی پرسە داراییەکان و چەند بابەتێکی دیکە کرا، تێیدا پرسی هەناردەکردنەوەی نەوتی هەرێمی کوردستانیش باسکرا.

لێدوانی فەرمی: خەلیل دۆسکی، پەرلەمانتاری عێراق و یەکێک لە بەشداربووانی کۆبوونەوەکە بە ئاڤا نیوزی گوت، حەیان عەبدولغەنی، وەزیری نەوت لە کۆبوونەوەکەدا باسی لەوە کردووە لەگەڵ کۆمپانیا نەوتییەکان لە گفتوگۆدان و تاوەکو ئێستا هیچ ڕێکەوتنێک نەکراوە.