مووچە و پلەی 369 خانەنشینی پله‌باڵا کەمدەکرێتەوە

ئاڤا نیوز

به‌ جێبه‌جێكردنی یاسای چاكسازی مووچەی 369 خانەنشینی پلەتایبه‌ت‌ هەموارکراوەتەوە، کە پێشتر وەکو ڕێزلێنان پلەکەیان پێدرابوو.

بۆچی گرنگە: ئەو کەسانە پێشتر بە پلەی ( دادوه‌ر، په‌رله‌مانتار، وه‌زیر، بریكاری وه‌زیر، ڕاوێژكار و بەڕێوەبه‌ری گشتی) مووچەیان وەرگرتووە، بەبێ ئەوەی ڕۆژێك لە ڕۆژان لەم پۆستانە خزمەتیان کردبێت.

زانیاریی تایبەت: ئەو 369 پلەتایبەتە ئێستا پلە و مووچەیان کەمکراوەتەوە و بە ناونیشانی ڕێزلێنانی پێشمەرگە مووچەیان پێدەدرێت.

ژمارەکان وادەڵێن: بەپێی ڕاپۆرتێکی فەرمانگەی هەماهەنگی و بەدواداچوونی حکومەتی هەرێمی کوردستان کە کۆپییەکی دەست ئاڤا نیوز کەوتووە، لە کابینەی نۆدا پێداچوونەوە بە دۆسیەی 340 هه‌زار و 921 فه‌رمانبه‌ردا كراوه‌.

لەو ژمارەیە هەزار و 545 دۆسیە خانەنشینی پلەتایبەت بوون، دوای وردبینیکردن دەرکەوتووە هەزار و 176 کەس بە فعلی پۆستەکەیان بینیوە ئینجا خانەنشین کراون، بەڵام 369 کەس پۆستەکەیان نەبووە، بۆیە پلەکەیان لێوەرگیراوەتەوە و پلەی ڕێزلێنانی پێشمەرگەیان پێدراوە.

باکگراوند: لەگەڵ دەستبەکاربوونی کابینەی نۆیەم لە چوارچێوەی پرۆسەی چاکسازی، مووچەی سەرجەم فەرمانبەرانی پلەباڵا لە 80% بۆ 50% کەمکراوەتەوە. بەگشتیی زۆربەی وەزیر و پەرلەمانتارە خانەنشینەكان بەراورد بە پێشتر هەر یەكەیان بڕی 4 ملیۆن و 738 هەزار دیناریان لێ كەمکراوەتەوە.