عێراق بەزیادکردنی باج داهات زیاد دەکات

ئاڤا نیوز  

حکومەتی عێراق خواستی ئەوەی هەیە لە بودجەی ساڵانی داهاتوودا داهاتی نانەوتی بۆ 20% بەرزبکاتەوە، بۆ ئەو مەبەستەش دەیەوێت سیستەمی دانانی باج لەسەر کەرتە جیاوازەکان فراوان بکات.

وێنە گەورەکە: کۆی گشتیی بودجەی عێراق  بۆ ساڵی 2024، نزیکەی 212 تریلیۆن دینارە و داهاتەکەشی نزیکەی 148 تریلیۆن دینارە، لەو بڕەش زیاتر لە 120 ترلیۆن دیناری لە داهاتی نەوتەوە دەستدەکەوێت، کە دەکاتە 81%ی کۆی گشتی داهاتی دەوڵەت.

لێدوانی فەرمی: مەزهەر محەمەد ساڵح، ڕاوێژکاری سەرۆکوەزیرانی عێراق بۆ کاروباری ئابووری ڕایگەیاند: فرەجۆرکردنی سەرچاوەکانی داهات گەورەترین ئاستەنگییە لەبەردەم چاکسازی دارایی وڵات، چونکە ئێستا تاکە داهاتی سەرەکی دەوڵەت بریتییە لە داهاتی نەوت.

چارەسەرەکان: "یەکەم هەنگاو بۆ فراوانکردنی سەرچاوەکانی داهات بریتییە لە چاکسازی لە سیستەمی باج و فراوانکردنی دانانی باج لەسەر ئەو کەرتانەی کە تائێستا فەرامۆشکراون یان خاوەنەکانیان خۆیان لە باج دزیووەتەوە، لە قۆناغی داهاتووشدا ڕێوشوێنی نوێی باج دەگرێتەبەر بۆ زیادکردنی داهات".  ڕاوێژکارەکەی سوودانی وادەڵێت.