پەرلەمانتارێکی دەم پارتی بۆ مەهەپە: بە بڕینی مووچە ناتوانن بمانوەستێنن

ئاڤا نیوز 

مێهمێت کەماچ، ئەندام پەرلەمانی دەم پارتی وەڵامی دەوڵەت باخچەلی، سەرۆکی مەهەپە دەداتەوە و ئەوان بەکەسانی دوور لە دیموکراسی و کۆنەپەرست ناودەبات و دەڵێت: لەو جۆرە هەڕەشانە ڕاهاتووین و "ناتوانن بە بڕینی مووچەکانمان بمانوەستێنن". 

 

چیرۆکی سەرەکی: دوای ئەوەی دەوڵەت باخچەلی، سەرۆکی مەهەپە بە زمانێکی زبر هێرشی کردە سەر دەم پارتی و داوای کرد، مووچەی ئەندام پەرلەمانەکانی ببڕێت بە بیانووی ئەوەی "ئەوان سەرچاوەی دارایی پەکەکەن"، کاردانەوەی لێکەوتەوە و دەم پارتی قسەکانی بە دوور لە دیموکراسییەت و " خاوەنداریەتیی خاک و خەڵکی تورکیا" لێکدەدرێتەوە.

 

لێدوانی فەرمی: مێهمێت کەماچ، پەرلەمانتاری دەم پارتی بە ئاڤا نیوزی گوت: ئێمە بە دوژمنایەتی و ڕقی ئەوان بۆ کورد ڕاهاتووین، ئێمە لەپێناو پارە کار بۆ دۆزی کورد ناکەین تاوەکو بە بڕینی مووچەکانمان بمانوەستێنن.

 

ئەوەی پێویستە بیزانیت: دەم پارتی 59 پەرلەمانتاری لە ئەنجوومەنی نیشتیمانیی تورکیا هەیە، مەهەپە 50 پەرلەمانتاری هەیە.

 

زانیاریی زیاتر: باخچەلی بە یەکێک لەو کەسایەتییە سیاسییانە ناسراوە، بەردەوام "دژایەتی دۆزی کورد و پارتە کوردییەکانی باکووری کوردستان و تورکیا" دەکات، بەڵام هەمیشە هەڕەشەکانی تەنیا وەک لێدوان دەمێنێتەوە.