حکومەتی عێراق بۆ ئاڤا نیوز: لێپرسینەوە لە شەڕی نێوان حەشد  و سوپا دەکەین

ئاڤا نیوز

بەرپرسی شانەی ڕاگەیاندنی ئەمنیی عێراق ڕایگەیاند، ئەو شەڕەی بەرەبەیانی ئەمڕۆ لە کەربەلا ڕوویدا پێشێلکردنی یاسایە و دەستدرێژیکاران بەپێی یاسا لێپرسینەوەیان لەگەڵدا دەکرێت.

 

چیرۆکی سەرەکی: بەرەبەیانی ئەمڕۆ پێنجشەممە  پێکدادان لەنێوان هێزەکانی حەشدی شەعبی و هێزێکی سوپای عێراقی بە چەکی سووک و مامناوەند لە کەربەلا ڕوویدا.

 

لێدوانی فەرمی: لیوا تەحسین خەفاجی، بەرپرسی شانەی ڕاگەیاندنی ئەمنیی عێراق بە ئاڤا نیوزی ڕاگەیاند: "ئەوەی دوێنێ لە کەربەلا و نەجەف ڕوویاندا پێشێلکردنی یاسایە، ئێمە بەپێی یاسا مامەڵەمان لەگەڵ دەستدرێژیکاران کردووە و بەپێی یاسا ئەمانە دادگایی دەکرێن".

 

زانیاریی زیاتر: پێشتر ئەفسەرێکی سوپای عێراق بە ئاڤا نیوزی ڕاگەیاندبوو: گرووپێک لە ئەندامانی حەشدی شەعبی "گرووپی جوندولئیمام" هەوڵیان داوە بە چەکەوە لە خاڵێکی پشکنین بپەڕنەوە و بچنە ناو کەربەلا، بەڵام لەلایەن هێزەکانی سوپای عێراقەوە ڕێگرییان لێکراوە و هێزەکانی جوندولئیمام تەقەیان بەرەو ڕووی هێزەکانی سوپای عێراقدا کردووە.

 

لەلایەکی دیکە: شەوی ڕابردوو بەهۆی شەڕەتەقەی نێوان دوو هۆز لە شاری نەجف، ژمارەیەک زیارەتکار برینداربوون و زیارەتکارێکیش کوژرا، لەسەر ئەو ڕووداوەش هێزە ئەمنییەکانی عێراق زیاتر لە 70 کەسیان دەستگیرکرد.