گرووپێکی ماددەی هۆشبەر ڕووبەڕووی هێزە ئەمنییەکانی زاخۆ دەبنەوە

ئاڤا نیوز

 

لە سەنتەری زاخۆ شەڕەتەقە لە نێوان گرووپێکی ماددەی هۆشبەر و هێزە ئەمنییەکان ڕوویدا و کەسێک دەستگیرکرا.

 

چیرۆکی سەرەکی: پێش نیوەڕۆی ئەمڕۆ هێزە ئەمنییەکانی زاخۆ هەوڵی دەستگیرکردنی گرووپێک لە بازرگان و بەکارهێنەرانی ماددە هۆشبەریان داوە، گرووپەکە چەکداربوونە، خۆیان ڕادەست نەکردووە و ڕووبەڕوویان بوونەتەوە. دواتر کەسێک دەستگیرکراوە و ئەوانی دیکەش ڕایان کردووە.

 

لێدوانی فەرمی:   سەرچاوەیەک لە ئاسایشی زاخۆ بە ئاڤا نیوزی گوت، ڕووداوەکە لە گەڕەکی تلکەبەری سەنتەری زاخۆ بووە،  جگە لە دەستگیرکردنی کەسێک، چەکدارەکانی دیکە ڕایانکردووە؛ هێزە ئەمنییەکان هەڵمەتێکی گەڕان و پشکنینیان لە شوێنەکە دەستپێکردووە.

 

زانیاریی تایبەت: ئەو گرووپەی ئەمڕۆ ڕووبەڕووی هێزە ئەمنییەکانی زاخۆ بوونەتەوە، پەیوەندییان بەو کەسانەوە هەیە کە سێ ڕۆژ پێش ئێستا لە زاخۆ ڕووبەڕووی هێزە ئەمنییەکان بوونەوە.

 

باکگراوند: مەترسیی ماددە هۆشبەرەکان لە هەرێمی کوردستان ڕۆژ بەڕۆژ زیاتر دەبێت، بەجۆرێک ئێستا زۆربەی زیندانییانی چاکسازیی گەورانی دهۆک بازرگان و بەکارهێنەری ماددە هۆشبەرەکانن. تەنیا لە ساڵی ڕابردوودا زیاتر لە هەزار و 200 کەس لەسەر ماددەی هۆشبەر دەستگیرکراون و دەستگیراوە بەسەر 700 کیلۆگرام ماددەی جۆراوجۆریشدا.