لە چوار ساڵدا 800 ملیار دینار بۆ خەزێنەی گشتیی حکومەت دەگەڕێنرێتەوە

ئاڤا نیوز 

 

له‌ ماوه‌ی چوار ساڵی كابینه‌ی نۆیه‌می حكومه‌تی هه‌رێمی كوردستان، له‌ڕێگه‌ی 102 داوای یاسایی 800 ملیار دینار بۆ خه‌زێنه‌ی گشتی ده‌گه‌ڕێنرێتەوە‌، له‌ داهاتی باجیش %40  بۆ خه‌زینه‌ی حكومه‌ت به‌رزده‌كاته‌وه. 

 

چاكسازی له‌ كه‌رتی نه‌وت

له‌م كابینه‌یەدا ڕاپۆرتەکانی (دیلۆیت) لەجیاتی ئەوەی سێ مانگ جارێک بڵاوبکرێتەوە كرایه‌ مانگانه،‌ ڕاپۆرتەکانیش له‌باره‌ی به‌رهه‌مهێنان، هه‌نارده‌كردن، فرۆشتن و خه‌رجیی داهاتی نه‌وت گاز بۆ ڕای گشتی، هاوكات 32 پاڵاوگه‌ی نایاساییش داخران.

 

بە ئەلیکترۆنیکردنی کاروباری حکومەت

پۆرتاڵی خزمەت، ئەرکی ئاشناکردنی هاووڵاتیانە بەو 499 خزمەتگوزارییەی کە لە 23 وەزارەت و دامەزراوەی حکومەتی هەرێم پێشکەش دەکرێت، حکومەتی هەرێمی کوردستان پلانی ئەوەی هەیە تا 2025 سەرجەم کار و خزمەتگوزارییەکانی لە ڕێگه‌ی ئەلیکترۆنییەوە پێشکەش بکات.

 

پێگه‌ی به‌رپرسانی باڵای حكومه‌ت

كابینه‌ی نۆیه‌می حكومه‌ت هه‌رێمی كوردستان بڕیاری داوە نابێ بەرپرسانی باڵای حکومەت پێگەی کارگێریی خۆیان بۆ بازرگانی و دەوڵەمەندبوون بەکاربهێنن. بە پشتبەستن بە یاسا بەرکارەکانی هەرێمی کوردستان، نابێ بەرپرسان کاری بازرگانی و بەڵێندەرایەتی و وەبەرهێنان بکەن و لێپرسینەوە لە هەر سەرپێچییەک لەم بوارەدا دەكات، ئه‌مه‌ له‌ كاتێكدایه‌ كه‌ سه‌رجه‌م پله‌ باڵاكان فۆرمی ئاشكراكردنی به‌رژه‌وه‌ندیی داراییه‌كان پڕكردووەته‌وه‌.  

ڕێكاره‌ یاساییه‌كان 

له‌ ڕێگه‌ی ڕێكاری یاسایی دوو هه‌‌زار و 353 ڕێكار به‌رامبه‌ر باجده‌ران و فه‌رمانبه‌ران له‌ ماوه‌ی ساڵانه‌ی 2019- 2023 گیراوەتەبەر.

 

زیادكردنی داهاتی باج 

بڕی داهاتی باج له‌ ماوه‌ی چوار ساڵدا له‌ (كۆمپانیاكان، ده‌رامه‌ت، خانووبه‌ره‌، خانووبه‌رەی میری و خاڵه‌ سنوورییه‌كان) به‌م شێوه‌یه‌ زیادی كردووه‌. 

-    ساڵی 2019، داهاته‌كه‌ 627 ملیار و 524 ملیۆن و 94 هه‌زار دیناربوو‌.
-    ساڵی 2020، داهاته‌كه‌ 795 ملیار و 37 ملیۆن و 267 هه‌زار دینار بوو‌.
-    ساڵی 2021، داهاته‌كه‌ 796 ملیار و 287 ملیۆن و 671 هه‌زار دینار بوو‌.
-    ساڵی 2022، داهاته‌كه‌ 912 ملیار و 588 ملیۆن و 802 هه‌زار دینار بوو.
-    ته‌نیا له‌ شه‌ش مانگی سه‌ره‌تای 2023 داهاتی باج 427 ملیار و 403 ملیۆن و256 هه‌زار دینار بووه‌.