مووچەی دوو مانگی هێزە ئەمنییەکان خەرج دەکرێت

ئاڤا نیوز

جێگری سەرۆکی پەرلەمانی عێراق ئەمڕۆ لەگەڵ سەرۆکوەزیرانی عێراق قسەی کردووە و بەڵێنی پێداوە ئەم هەفتەیە و هەفتەی داهاتوو مووچەی دوو مانگی هێزە ئەمنییەکان خەرج بکات.

وێنە گەورەکە: زیاتر لە 50 ڕۆژە هیچ مووچەخۆرێکی هەرێمی کوردستان بە سەربازی و مەدەنییەوە مووچەی وەرنەگرتووە و وەزارەتی دارایی عێراق هەر هەفتەیە و بیانووێکی نوێ بۆ خەرجنەکردنی دەهێنێتەوە.

 

لێدوانی فەرمی: شاخەوان عەبدوڵڵا، جێگری سەرۆکی پەرلەمانی عێراق ئەمڕۆ دوو شەممە ڕایگەیاند، لەگەڵ محەممەد شیاع سوودانی، سەرۆکوەزیرانی عێراق قسەی کردووە، هەر ئەمڕۆ وەزارەتی دارایی ڕاسپاردووە مووچەی مانگی حەوت و هەفتەی داهاتووش مووچەی مانگی هەشتی هێزە ئەمنییەکان خەرج بکات.

خاڵی ئەرێنی: شاخەوان عەبدوڵڵا ڕوونیکردووەتەوە؛ بەهۆی چەند بیانووییەک وەزارەتی دارایی عێراق مووچەی چەند توێژێکی بڕیوە، بەڵام چەند پێشنیازێک خراونەتەڕوو، لەوانە "ئەوانەی دووجار ناویان هاتووە ئەوانەن کە فەرمانبەرن لە هەرێمی کوردستان و مووچەی چاودێریی کۆمەڵایەتییان لە حکومەتی عێراق هەیە، نووسراو ئاراستەی وەزارەتی کاری عێراق بکرێت بۆ ئەوەی مووچەیان ببڕێت، نەک بڕینی مووچەکانیان لە حکومەتی هەرێمی کوردستان".

گۆشەیەکی دیکە: کێشەی نەبوونی بایۆمەتری بەشێک لە مووچەخۆران، بیانووێکی دیکەی وەزارەتی دارایی عێراقە بۆ نەناردنی  مووچە، شاخەوان عەبدوڵڵا دەڵێت بە سوودانی گوتووە: ئەوانەی بایۆمەترییان نەکردووە مانای وانییە بوونیان نییە، هاوکات لە حکومەتی عێراقیش فەرمانبەر هەیە بایۆمەتری نەکردووە، پێشنیازمان کردووە گشتاندنێک بکرێت، هەموو ئەو فەرمانبەرانەی بایۆمەترییان نەکردووە، ماوەیەکیان بۆ دیاری بکرێت و لەو ماوەیە ئەنجامی بدەن.

ئەوەی پێویستە بیزانیت: حکومەتی هەرێـمی کوردستان لە سەرەتای ئەمساڵەوە لە کۆی 600 هەزار مووچەخۆر کە مابوون، تەنیا  100 هەزار مووچەخۆر ماون بایۆمەترییان بۆ بکات.