تورکیا چوار ملیار دۆلار بۆ بنیاتنانەوەی ناوچە زیانلێكەوتووەكانی بومەلەرزە تەرخان دەکات

ئاڤا نیوز 

توركیا نزیکەی چوار ملیار دۆلار بۆ بنیاتنانەوەی ناوچە بوومەلەرزە لێدراوەکان لە ساڵانی 2023 و 2024 تەرخانکردووە.  

وێنە گەورەکە: تورکیا بەردەوامە لە بنیاتنانەوەی ئەم ناوچانەی کەوتوونەتە ژێر کاریگەری بوومەلەرزەکەی شەشی شوبات لە کاھرەمانماراش، دامەزراوە نێودەوڵەتییەکانیش بەردەوامن لە وەبەرھێنان لەم ناوچانە.

لێدوانی فەرمی: محمد شیمشەک، وەزیری دارایی و خەزێنەی تورکیا رایگەیاند: بەمەبەستی ساڕێژکردنی برینەکانی بوومەلەرزەکەی شەشی شوبات لە کاھرەمانماراش، دابینکردنی سەرمایەی بیانی بۆ بنیاتنانەوەی ئەم ناوچانە گەیشتووەتە نزیکەی چوار ملیار دۆلار لەماوەی نێوان ئەم دوو ساڵە. ھەروەھا دانوستانەکان بەردەوامن بۆ دابینکردنی نزیکەی دوو ملیار دۆلاری دیکە تا کۆتایی ئەمساڵ.

زانیاریی زیاتر: ئەم پارەیە بەمەبەستی نۆژەنکردنەوە و بنیاتنانی ڕێگاوبان و تونێل و ژێرخانی ئەم ناوچانە بەکاردەھێنرێت کە بەھۆی بوومەلەرزەکە زیانیان بەرکەوتووە.

باكگراوند: لە شەشی شوباتی 2023  دوو بوومەلەرزە بە قەبارەی 7.7 و 7.6 لە شاری قەھرەمانماراشی دا و نزیکەی 11 گەورە شاری ئەو وڵاتە کەوتنە ژێر کاریگەری ئەم بوومەلەرزەیە و 54 ھەزار کەس گیانیان لەدەست دا.